Rego sinala que na sesión do Congreso dos Deputados da cuarta feira reclamará á vicepresidenta primeira e ministra de Facenda. María Jesús Montero, soberanía fiscal e un concerto económico que “dea a Galiza a chave dos seus cartos e un maior autogoberno para ter capacidade normativa e de recadación”.
O voceiro nacionalista na Cámara Baixa entende que o actual sistema de financiamento “discrimina gravemente a Galiza”. Neste punto destaca que a liquidación do sistema de financiamento de 2021 sinala que o Estado non devolveu a Galiza 5.082 millóns de euros recadados no país en impostos.
“Unha cantidade astronómica”, asegura Rego, “tendo en conta tamén que a Galiza é un país que actualmente está a cola no Estado español en indicadores socioeconómicos e de calidade de vida"
"É evidente”, continúa Rego “que a Galiza non pode permitir o luxo de seguir perdendo ese diñeiro, necesitámolo e ademais é de xustiza porque é dos galegos e galegas”. Neste liña, lembra que cun sistema de concerto os recursos da Administración galega poderían incrementarse “entre tres mil e catro mil millóns de euros” ao ano.
O deputado do BNG preguntaralle a Montero se "o Executivo está en disposición de acordar un sistema de financiamento xusto para a Galiza, que recoñeza a súa singularidade e acabe coa discriminación que implica o modelo actual".
A pregunta de Rego chega tras recoñecer a ministra de Facenda a pasada semana que Galiza está mal financiada e abrir a porta a estender a outros territorios o modelo acordado para Catalunya entre ERC e o PSOE.
Rego reclamará “un sistema de financiamento específico que teña en conta as nosas necesidades e que permita acabar co espolio fiscal ao que vén sendo sometido o noso país desde hai décadas".
O responsábel nacionalista urxe “dar ao noso país a capacidade normativa e de recadación, así como pór en marcha unha negociación bilateral co Estado para acordar que parte se destina a servizos comúns”.