Hai unha Galiza, a que deixa en “situación crítica” o PP de Núñez Feijóo após sete anos de goberno, e hai outra Galiza, “a que queremos”, afirma o BNG, que é ben diferente ao país “nunha situación de emerxencia nacional e social” tras dúas lexislaturas dos populares. Os nacionalistas presentaron este sábabo na capital galega as Bases Programáticas para Galiza, as liñas e propostas chaves para reverter a actual situación. Unha presentación a cargo da portavoz nacional e candidata, Ana Pontón, e dos candidatos polas outras circunscricións: Luis Bará, Noa Presas e Olalla Rodil, e o número 2 pola Coruña, Xosé L. Rivera 'Mini'. Un total de 33 medidas que constitúen un auténtico “plan de choque” para que Galiza deixe atrás a “desfeita” de sete anos de goberno de Feijóo.
Dez son os puntos básicos sobre os que se debruza o BNG, centrados no emprego, nos dereitos e servizos sociais, na democracia e participación e noutro modelo de territorio e infraestruturas. Tecidos coa chave de bóveda de defender o dereito “a decidir nós sobre o noso”. Fronte ao desemprego, emigración, despoboamento... Pontón ten claro que a receita non pasar por “un corta e pega de Ferraz, Génova ou da Complutense” mais por un “proxecto de país”.
“Un goberno galego”
Tomaron a palabra 'Mini' para defender o sector leiteiro galego e Noa Presas, que reivindicou “unha Galiza de dignidade” fronte a aqueles que non son quen de ofertar máis que “unha Galiza de supervivencia”. Luis Bará dixo que o BNG fará da Xunta “un verdadeiro goberno galego” e non unha simple “delegación do goberno español en Galiza”. Olalla Rodil incidiu nos compromisos e traballo do nacionalismo en eidos como a igualdade, enfatizando a necesidade de que as institucións combatan a violencia machista con o mesmo compromiso co que o nacionalismo o fai nas rúas.
Para a portavoz nacional, Ana Pontón, Feijóo é un presidente “tóxico” para Galiza, cun proxecto que nada ten a achegar ao país. “Os vaivéns de Feijóo delatan o pouco peso que ten a palabra dun presidente que xa anunciara que as eleccións ían ser entorno ao 20 de outubro, emprazámolo a que deixe de especular sobre as eleccións porque pensamos que non é de recibo que o día que imos votar en Galiza se decida en Euskadi ou que a data estea condicionada pol trama Gürtel”.
“Temos valentía e capacidade”, dixo Pontón, que situou as propostas do BNG como a alternativa que Galiza precisa, a antítese a sete anos de gobernos do PP.