Galiza Nova, a organización xuvenil do BNG, presentou esta segunda feira en Vigo a súa nova imaxe visual para "adaptarse aos tempos de hoxe" e continuar cun cambio para Galiza "imparábel" e liderado polas nacionalistas. Nun acto ao que asistiron máis de medio cento de persoas, Galiza Nova reivindicou a súa "loita diaria para conseguir unha sociedade mellor", instando os seus afiliados e afiliadas a seguir traballando para lograr os seus obxectivos e situar o BNG á fronte da Xunta da Galiza.
O encargado de abrir o acto foi o portavoz local do BNG, Xabier Pérez Igrexas, quen mostrou o seu orgullo por formar parte de Galiza Nova e puxo en valor a importancia da organización. Os mozos e mozas, salientou, permitiron que nas últimas eleccións galegas o Bloque fose a primeira forza política en Vigo, superando o Partido Popular.
Por iso, pediulles que "non baixen os brazos" porque a mocidade "ten todo por gañar", xa que coa súa forza poderá abrirse paso "á nova Galiza que vén". E tras Igrexas, a secretaria xeral de Galiza Nova, Marta Gómez, tomou a palabra, insistindo na "necesidade" de cambiar por primeira vez en 36 anos de historia a identidade visual da entidade.
O obxectivo, dixo, era "manter a esencia, pero adaptarse aos tempos de hoxe". Gómez agradeceu o labor das e dos militantes actuais, pero tamén a dos anteriores que foron medrando e deixaron pasado aos máis novos.
A portavoz nacional do BNG, Ana Pontón, foi a encargada de fechar o acto, destacando Galiza Nova como unha "peza fundamental do nacionalismo" e solicitando a toda a militancia que "trate de sumar a máis mozos e mozas a este proxecto".
"Sempre somos militantes de Galiza Nova. Eu fun, son e serei sempre militante desta organización", engadiu, asegurando que o BNG "confía moito" na mocidade, xa que "busca un futuro" na Galiza e pretende achegar o seu gran de area para que "se faga realidade" esta pretensión.
Para Pontón, os mozos e mozas teñen que ser "as protagonistas do cambio", polo que lles pediu unha mobilización "permanente" xa que, ao seu xuízo, "cando alguén quere cambiar algo, non o consegue tres meses antes das eleccións".
