O seu ansiado camiño cara a Madrid xa parecera aberto despois da súa segunda maioría absoluta, en outubro de 2012. Mais aos poucos meses, o pasado cruzóuselle diante: El País publicaba unhas fotos en que aparecía co narcotraficante Marcial Dorado nunha lancha e compartindo viaxes a, por caso, Andorra. A operación Feijóo Moncloa ficaba temporalmente abortada. Esas mesmas fotos protagonizaron os intres máis rechamantes, sobre todo para a audiencia foránea, da entrevista no programa Salvados que, hai unhas semanas, volveu disparar os rumores.
“Ten toda a pinta de que quere marchar a Madrid”, afirma Miguel Anxo Bastos, profesor de Ciencias Políticas na Universidade de Santiago e analista, en declaracións a Sermos Galiza, “por que, se non, vai a un programa de máxima audiencia a que lle chamen de todo?”. Tampouco é que lle chamasen de todo. Máis ben percibiuse o enorme contraste entre o tratamento habitual de Feijóo na meirande parte da prensa galega e unha conversa xornalística sen tantas dependencias. Mais Bastos insiste e lembra como, alén de Salvados, o presidente tamén fixo de figura central nun encontro dos Partidos Populares europeos.
“Se quixese deixar a política, había andar por aí desa maneira?”, pregúntase. Porque a de La Sexta foi a aparición máis comentada. Pero non a única. Practicamente todos os grandes rotativos españois publicaron entrevistas co líder da dereita galega ao longo dos últimos meses. Xusto, ademais, cando Mariano Rajoy e o PP atravesan as súas horas máis baixas.
[Podes ler a peza íntegra no número 288 de Sermos Galiza, á venda na loxa e nos quiosques habituais]