Na sesión vespertina da asemblea nacional do BNG deste domingo aprobáronse as propostas de resolución sobre Catalunya; o Sáhara, Palestina e Curdistán; sobre o galego e sobre Xove. A respeito do proceso soberanista catalán, o BNG denunciou a “actitude autoritaria e profundamente antidemocrática do Estado español”. Máis unha vez, a organización frontista expresou “a plena solidariedade co pobo catalán e o total apoio ao proceso para a independencia de Catalunya”.
En relación a Xove, e cando se fan os 40 anos da primeira e histórica marcha antinuclear que partiu de Viveiro, a formación nacionalista recoñeceu “a vontade de loita e a determinación do pobo galego”. Apelou á “capacidade mobilizadora do pobo organizado para confrontar con intereses políticos e económicos moi poderosos e antagónicos coas necesidades da maioría social da nosa nación”.
Sobre a lingua, o BNG salientou que “o nacionalismo asume como propio o obxectivo reintegracionista” e apostou en incrementar as relacións cos países lusófonos. Chamou a “aproveitar a dimensión internacional da nosa lingua”.
E, por último, a respeito do Sáhara, Palestina e Curdistán, o BNG defendeu o “dereito inalienábel de autodeterminación dos pobos” e o dereito que teñen os pobos saharauí, palestino e curdo a decidiren libremente o seu futuro”. “Exiximos que os Estados ocupantes poñan fin ás agresións e demandamos da comunidade internacional que faga cumprir os acordos e resolucións internacionais e das Nacións Unidas para que os pobos saharauí, palestino e curdos poidan exercer o dereito democrático de autodeterminación”, sinalouse nas propostas de resolución.
Emendas aprobadas
Fontes da organización consultadas por Sermos Galiza afirman que o plenario aprobou un total de 156 emendas das 296 presentadas ás teses políticas, aprobadas con 96,8% dos votos.
