Reparto dos menores migrantes: a farsa continúa

En Canarias hai actualmente máis de 6.000 menores non acompañados (Menas), que viven nunha situación moi mala porque non hai prazas para acoller tanta xente. Antes da reunión na que participa tamén PP para repartir eses menores, Vox anunciaba que se o PP asinaba algún acordo, consideraría rotos os cinco gobernos nos que participa co PP, cousa que fixo despois dunha reunión de máis de tres horas, con división na Executiva de Vox. Repartiranse 347 menores e 110 corresponderían ás cinco autonomías con goberno PP-Vox. A recente ruptura dos gobernos de PP-Vox en cinco comunidades autónomas polo tema da recepción de menores que chegaron a Canarias e se distribuirían por todo o Estado a petición desa autonomía podería dar a impresión de que o PP vai ter agora unha posición máis moderada, solidaria e humana, pero nada máis lonxe da realidade. O PP non rompe con Vox Non hai ruptura do PP con Vox na actuación política e o mesmo día que a dirección de Vox anunciaba a súa saída dos gobernos co PP (11 de xullo de 2024) aprobaban na Comunidade Valenciana, con aperta incluída, unha lei contra a memoria histórica, que iguala ditadura e democracia e branquea o franquismo: votos a favor de PP (40) e Vox (13) e en contra de PSPV-PSOE (31) e Compromís (15). En medio deste debate, Miguel Tellado (PP) propuña enviar a Armada española para deter os barcos con inmigrantes. Onde queda a humanidade do PP? Non é nada novo o discurso xenófobo do PP e Ayuso manifestaba en xaneiro de 2024, coincidindo coa chegada a Alcalá de Henares de inmigrantes trasladados polo Goberno desde Canarias: "Producíronse graves incidentes e agresións sexuais a mulleres do municipio", e acusaba ao Goberno español de "enviar inmigrantes con nocturnidade en avións a lugares onde goberna o PP". Feixoo coincidía con este discurso de Ayuso e na campaña electoral das eleccións cataláns quería disputar a Vox e Aliança Catalana o voto xenófobo e manifestaba: "A inmigración ilegal entra nas nosas casas, ocupando os nosos domicilios e non podemos entrar nas nosas propiedades". Feixoo asumía o discurso de Vox e criticaba os traslados desde Canarias a outros puntos do Estado: "Está metendo en avións a esas persoas, deixándoas en paradas de autobús nos pobos e cidades de España", que é unha falsidade. En Aragón gobernaban PP e Vox e a presidenta das Cortes, Marta Fernández (Vox), manifestaba: "A violencia de xénero non existe", e continúa no seu posto co apoio do PP. En Baleares o presidente do Parlamento, Gabriel Le Senne (Vox), rompía unha foto de Aurora Picornell, asasinada polo fascismo, e segue no seu cargo. Nada máis iniciar a lexislatura, PP e Vox comezaban o proceso para a eliminación das leis de memoria democrática nas cinco autonomías onde gobernaban. En Burgos suprimían dos orzamentos municipais unha partida de 40.000 euros para as asociacións memorialistas e 15.000 euros para a Cátedra de Memoria Democrática da Universidade de Burgos. Eliminación de conquistas sociais Esta aparente ruptura dos goberno autónomos de PP e Vox, vai supor un cambio na liña de actuación nos 150 concellos onde gobernan, entre eles cidades que son capitais de provincia: Valladolid, Burgos, Toledo, Guadalaxara, Cidade Real e Valencia? En absoluto. Vexamos como actúan, con total camaradería, PP e Vox, eliminando conquistas sociais: retiran as bandeiras LGTBI dos concellos de Elxe e Burgos e os libros LGTBI da área de infantil da biblioteca de Burriana (Castellón). Na Rioxa derrogaban a Lei de Protección Animal. En Valencia (Alcaldía do PP) os catros concelleiros e concelleiras de Vox néganse a oficiar vodas civís. En Ponferrada, Burgos, Orihuela, Níjar (Almería), Huelva, suprimen a Concellaría de Igualdade. En Toledo utilizan coche da Policía Local para difundir proclamas antiabortistas. A decisión de Vox pode obedecer a un cambio das alianzas despois das eleccións europeas: abandona o grupo dos Conservadores e Reformistas Europeos (ECR) para pasarse a Patriotas por Europa con Agrupación Nacional Francesa, de Marine Le Pen, e Vikor Orbán (Hungría), entre outros; e para recuperar o 30% dos votos que nas europeas se foron para a candidatura de Alvise, que fixo do racismo e da xenofobia un dos seus reclamos electorais. No PP parecen encantados con esta aparente ruptura, pero é unha separación de conveniencia porque son todas e todos da mesma familia No PP parecen encantados con esta aparente ruptura, pero é unha separación de conveniencia porque son todas e todos da mesma familia (Feixoo xa invitou a desertores de Vox a regresar á casa do PP) e seguirán coincidindo nos grandes temas políticos. Que ninguén se confunda: con Feixoo a farsa continúa.