O Consello da Xunta autorizou nesta quinta feira máis un convenio de colaboración entre a consellaría de Benestar e a entidade relixiosa Esclavas de la Virgen Dolorosa co obxectivo de "contribuír ao apoio do servizo que presta na atención a persoas con discapacidade intelectual" a través do Centro Residencial Asistencial Nuestra Señora de Fátima y Cristo Rey ubicado na localidade pontevedresa de Crecente.
O montante adxudicado desta volta é de 250.000 euros, que veñen sumarse aos 1.038.441,60 euros que o departamento que dirixe Beatriz Mato entregou á mesma entidade en 2012, tal e como publicou o Diario oficial de Galiza o 1 de xuño, enumerando os convenios asinados nos catro primeiros meses do ano. Tales axudas resultan rechamantes, pois o ano pasado deixaron de funcionar o centro de menores de Montealegre, en Ourense, e o de Soutomaior, en Ferrol. Alén destes, o pasado ano a consellaría de Benestar eliminou o centro de atención especializada do Santiago Apóstolo, e privatizou o centro Souto de Leixa, en Ferrol, que acabou sendo propiedade do grupo empresarial CLECE, vinculado a Florentino Pérez. Estes dous últimos centros prestaban atención, xustamente, a persoas con diversidade funcional.
"Nenas", "rehabilitación de nais solteiras", "capacitación para unha vida honrada"
Porén, cal é o servizo que emprestan as Esclavas de la Virgen Dolorosa e que a Xunta teima en subvencionar con diñeiro público? Segundo elas propias informan na súa páxina web, as "casas" que, empregando a toponimia deturpada, ubican en "Creciente" e en Mos, as dúas que xestionan na Galiza, acollen mulleres adultas con diversidade funcional. Porén, a entidade refírese a elas como "nenas" e salienta que "para as salvar non se escatima en medio algún". Se continuamos a ler, a congregación relixiosa explica que "a misión preferencial está ao servizo da rehabilitación de nais solteiras e do coidado dos fillos", mulleres ás cales lles ofrecen "capacitación para unha vida e un traballo honrado".
Cómpre sinalar tamén que a mencionada entidade relixiosa incumpre até catro normativas oficiais. Tamén segundo un documento redactado por elas propias en decembro de 2012 onde anunciaban actuacións de rehabilitación nos edificios, recoñecen "carencias graves relativas á seguridade de utilización, accesibilidade e incendios". Nomeadamente, vulneran o decreto 35/2000 sobre a lei de accesibilidade e supresión de barreiras na Galiza; o Código técnido de edificación; o decreto 243/1995 que regula o réxime de autorización e acreditación de centros de servizos sociais; e, en relación a este último, a orde de 2007 que o desenvolve.
