Os resultados das probas PCR seguen arroxando unha realidade de novos contaxios na Galiza. Os casos activos subiron en 21 nas últimas 24 horas e o virus chegou a outras 201 persoas. O ritmo baixou un pouco se ben a cifra é inestábel desde hai días e, en todo caso, segue a ser moi elevada.
Este último balance da Dirección Xeral de Saúde Pública é froito da baixada do número de contaxios novos e de casos positivos nalgunhas áreas sanitarias. En concreto, houbo máis altas que baixas de doentes en catro zonas e o número total de afectadas é de 4.322.
O cómputo global segue a baixar lentamente na Coruña e Cee, onde entre a noite desta segunda feira e onte as responsábeis da Consellaría de Sanidade tiveron noticia de 9 pacientes menos. Agora son 1.237.
En Ourense (500) caeron en 3 as enfermas, mentres que na zona de Compostela houbo unha reducción de 14 pacientes, quedando nas 659. En Ferrol a cifra só se rebaixou en un positivo e manténse por enriba dos 180.
A situación volveu dar a volta en Lugo con 9 contaxios máis, dos que polo menos 6 están relacionados co feche do restaurante A Cofradía de Rinlo polo contaxio dalgunhas empregadas e empregados. Agora hai 781 casos activos. En Pontevedra é onde máis crece a presenza do virus, con outros 25 casos máis até sumar 577.
Onte o responsábel da área sanitaria recoñecía certa preocupación e revelaba que máis da metade das contaxiadas proceden dos concellos de Pontevedra, Poio e Vilaboa. Curiosamente, desde hai días nestes municipios existen limitacións extra impostas pola Xunta.
En Vigo o ascenso foi de 14 doentes até os 387 actuais. De todos os positivos, 29 permanecen nas UCI e 211 en unidades de hospitalización. No entanto, a inmensa maioría reciben seguemento telefónico domiciliario.
Desde o principio da pandemia, e sempre segundo informes de Sanidade, xa se curaron 15.829 galegas e galegos, se ben tamén faleceron 696, dúas máis das que incluía o parte anterior. Un 44% dos pasamentos tiveron relación cos xeriátricos.
Onte unha das vítimas foi un home de 86 anos que finou no Hospital Lucus Augusti (HULA) pero que fora trasladado desde a residencia DomusVi de Outeiro de Rei. Tamén morreu unha muller de 91 anos, con patoloxías previas, no Hospital Virxe da Xunqueira de Cee.