Un Festigal para "pór en valor todo o potencial creativo que ten este país"

Xa se coñece o novo cartel do Festigal. A comisión organizadora confirmou esta sexta feira as actuacións para a 22 edición, que contará neste 2024 con Mondra, PAVA-Lucía Aldao, Donicelas e DJ Misa. Súmanse así aos concertos xa confirmados de Rebeliom do Inframundo, De Ninghures e Filloas, completando unha ampla programación de actividades culturais, palestras, artesanía e obradoiros nos días 24 e 25 de xullo en Compostela.

Así o anunciaron  representantes da comisión organizadora do Festigal, promovido pola organización xuvenil Galiza Nova e pola Fundación Galiza Sempre, xunto con membros das bandas participantes. Aliás, avanzaron a nova localización do espazo de concertos que, este ano, se traslada ao campo de hóckey do Campus Vida, a poucos metros do espazo no que decorreron as actuacións de pasadas edicións.

"Renovamos a nosa aposta por dar voz e visibilidade ao enorme talento musical e cultural que medra cada día na Galiza, con concertos e actividades para todos os públicos para seguir construíndo e alargando a conciencia de país", salientaron durante a presentación do cartel deseñado por Bruno Lopes Teixeiro.

Filloas, De Ninghures, Mondra e Rebeliom do Inframundo serán as encargadas de abrir os concertos na noite do 24 de xullo. Pola súa parte, no Día da Patria Galega chegará o momento das actuacións de PAVA-Lucía Aldao, Donicelas e DJ Misa, nunha xornada que contará cunha ampla programación para dar a coñecer novas iniciativas artísticas e culturais da Galiza.

Oferta gastronómica

Así, o público do Festigal contará o 25 de xullo con presentacións de libros e palestras, postos de artesanía, espazo de asociacións, música tradicional e obradoiros infantís, entre outras actividades, xunto cunha zona de acampada próxima á localización do evento. Outra das novidades desta edición é a ampliación do espazo de xantar e da oferta gastronómica na Carballeira de San Lourenzo, dispoñíbel durante todo o evento, tanto a noite do 24 como o propio Día da Patria Galega. Avanzaron, así mesmo, que nesta edición estase a traballar nun concurso de cantos de taberna, que servirá, sinalaron, para animar a contorna festivaleira ao longo e ancho do recinto.

"Escaso apoio institucional"

Desde a organización tamén denunciaron o "escaso apoio institucional" por parte da Xunta da Galiza "a festivais organizados polo tecido asociativo, como o Festigal, fronte ao importante soporte que concede a eventos multitudinarios organizados por empresas, malia que os grupos en galego sexan unha minoría". Como exemplo desta cuestión subliñaron casos como o Son do Camiño ou o Gozo Festival, que "van recibir un ano máis un investimento millonario do Goberno galego, baixo o pretexto de proxectar o turismo no país, malia carecer de ningún elemento identitario que poña en valor a cultura galega". 

De Ninghures

Sete mozos e mozas dos anos 1990 compoñen De Ninghures, unha banda que defende unha música feita de raíz e a creación contemporánea pondo en valor a música tradicional galega. Con influencias que van desde as músicas do Magreb, pasando polo rock saharauí até as melodías cubanas, a formación asegura ter os pés na terra á vez que unha mirada global.

PAVA-Lucía Aldao

A poeta coruñesa Lucía Aldao traerá ao escenario do Café Concerto o seu segundo traballo en solitario, 'PAVA2', despois de máis de 20 anos de carreira no mundo da poesía escénica, do humor e da música. Emoción e sorna, revisión e identidade e amizade e crítica son os pares que tecen o fío condutor da obra que presentará nesta edición do Festigal.

Donicelas

Para as Donicelas a pandeireta e os cantos tradicionais comezaron sendo un xogo desde que eran nenas, momento de inicio dunha andaina de case tres décadas na que percorreron gran parte da Galiza e do norte de Portugal. Unha aposta pola música tradicional galega de autor e con arranxos propios. 

DJ Misa

Orixinaria de Gondomar (comarca de Vigo), DJ Misa é unha apaixonada da música desde cativa. Os seus sets vense influenciados polo bo momento musical do panorama galego, e tratan de levar a diversión fusionando o pop coa música tradicional galega.

O cartel desta edición

A comisión do Festigal quixo que o pobo palestino e o xenocidio perpetrado por Israel estean presentes nesta edición, tal e como amosa o cartel, no que unha moza que sostén unha bandeira da Patria Galega tamén porta unha keffiyah.

Tamén hai unha chiscadela no cartel á Xeración Nós. Segundo sinalou Lucía Veciño, secretaria da Fundación Galiza Sempre, "é unha clara referencia a esa parte da cultura galega e a esa tradición política que temos, sen esquecer que o Festigal ten un precedente, como eran os concertos do Festival das Arengas [que decorreron de forma paralela ao mitin homónimo con motivo do Día da Patria nos anos 1934 e 1935]".

"Este proxecto, que está feito coas nosas mans quere pór en valor a nosa música, a nosa cultura e todo o potencial creativo que temos neste país", destacou a secretaria xeral de Galiza Nova, Marta Gómez.