Hai un mes, o Goberno español anunciou unha liña de axudassol a arrendatarias en situación de vulnerabilidade. Hoxe, 1 de maio, o Boletín Oficial do Estado recolle unha Orde Ministerial na que se especifican os criterios dos créditos sen intereses para cubrir o pagamento do aluguer. Así recolle a Fundación Civio as medidas:
Os préstamos poden cubrir o pagamento de até seis meses, comezando a contar desde a mensualidade de abril e sen prexuízo de cando sexan concedidos. O tope dos préstamos por mes é de 900 euros, un total de 5.400 se se solicitan para o período de medio ano.
Para financiar esta medida, o Goberno español destina un total de 1,2 millóns de euros. Ademais, o máximo que abonará ás entidades de crédito en materia de gastos ou intereses dos préstamos fíxase en 112 millóns. Isto é, cando ambas cifras cheguen a 0 euros deixaranse de conceder os créditos.
Neste artigo Nós Diario recolleu outras das medidas anunciadas polo Goberno español en materia de vivenda durante a emerxencia sanitaria da COVID-19. Polo momento, as específicas para os Gobernos territoriais aínda non foron anunciadas.
Quen pode solicitar estes créditos e como?
As demandantes deberán cumprir todas as condicións mencionadasa a continuación:
Non deben ter unha vivenda en propiedade, agás cando esta é parte dunha herdanza ou non se pode empregar por divorcio ou falta de adaptabilidade para persoas con discapacidade.
A maiores, as integrantes da unidade familiar da solicitante teñen que ingresar menos de 2.689 euros ao mes ou cinco veces o IPREM (o índice empregado para calcular as contías das prestacións sociais).
Paralelamente, débese demostrar unha redución dos ingresos a consecuencia da crise sanitaria, ben sexa porque a demandante está no paro, nun Expediente de Regulación Temporal de Emprego ou solicitara a súa redución de xornada por coidados, entre outras opción.
Outro requisito é que a suma da mensualidade do alugueiro e doutros servizos básicos como a factura da luz, da auga, os pagos á comunidade ou o contrato telefónico supón, polo menos, 35% dos ingresos totais da unidade familiar.
Os préstamos solicitaranse ás entidades bancarias que participen da iniciativa do Goberno español e devolveranse nos 6 anos seguintes á petición, sen intereses nin gastos de ningunha clase. Serán as propias entidades as encargadas de abonar as mensualidades directamente ás caseiras.
Na solicitude débese aportar a documentación necesaria para acreditar a situación de vulnerabilidade ou unha declaración responsábel na que consten as condicións. Isto é: o libro de familia, o certificado de empadroamento, o certificado de desemprego ou ERTE de ser o caso e mais o certificado catastral ou a declaración de bens da unidade familiar.
A petición irá acompañada dun impreso que inclúe a orde ministerial publicada hoxe e unha declaración responsábel que acredite a situación de vulnerabilidade así como a falta dos documentos que non se poidan aportar. Se o contrato está a nome de varias arrendatarias, todas deberán solicitar o préstamo conxuntamente.
Esta liña de créditos é compatíbel coas axudas ao aluguer que o Goberno español consensuará cos Gobernos territoriais. Porén, a Administración central aínda non achegou nin a financiación nin se concretaron as condicións das mesmas.