Os máis de 120 armadores do cerco (dun total de 156 barcos que hai en Galiza) que asistiron na mañá deste sábado á asemblea de Portosín dixeron un claro e rotundo 'non' aos contidos do principio de acordo que na tarde da sexta feira acadaran en Compostela Consellaría do Mar e unha delegación do sector. A asemblea non estivo exenta de discusións e tensións, como recoñecen asistentes á mesma, mais o acordado nela foi, en palabras de J. Blanco, “case todo por unanimidade”.
E o acordado é que o reparto feito desde Madrid non val ao sector galego, que entende que do mesmo sae "moi prexudicado". As 1.450 toneladas de xarda que esta semana o Ministerio engadiu ao cupo galego (após negociar con Noruega, UE e Illas Feroe) non son motivo de abondo para aceptar o borrador. “O problema é o reparto”, insisten, “que non é xusto para os nosos barcos”. Queren que o reparto sexa liñal, tendo en conta número de barcos e tripulantes. Esa é a vía, afirman, para que non se den as fendas nos cupos de xarda e xurelo entre as frotas galega, asturiana, cántabra e vasca que hai na proposta do Ministerio.
A frota galega seguirá, logo, amarrada e haberá novas mobilizacións (“que xa se comunicarán no seu momento, non imos desvelar nada”). Ademais, queren que a conselleira do Mar vaia coa delegación do cerco de Galiza a Madrid para defender a postura do sector perante o Ministerio e que se retire a proposta inicial.
A CIG denuncia ''enganos da Xunta''
Xabier Aboi, da CIG-Mar, denuncioun esta semana que o actual sistema de reparto a flota galega. Un prexuízo do que, apunta, os únicos culpábeis desta situación é a Xunta do PP “porque non soubo defender os intereses do sector”.
O nacionalista sinala que o reparto para este ano que xera o rexeitamento do sector galego fíxose en ao histórico de 2002 a 2011, “obviando todo o período anterior”. Isto supuxo que os 154 barcos da flota galega lograsen 1900 toneladas (24% da cota), fronte ás 1900 dos 44 barcos cántabros (24%) e ás 3800 toneladas (48%) que lle corresponderon aos vascos a pesar de que contan unicamente con 70 barcos”.
Aboi criticou o anuncio feito onte pola conselleira do Mar no sentido de que a flota galega ía contar con 1.450 toneladas máis en virtude dun novo acordo entre a UE, Noruega e as Illas Feroe. “O que non din é que este novo reparto volve agrandar as diferenzas, porque os cántabros reciben tamén 1.450 novas toneladas e os vascos outras 3000. “O desequilibrio é tan evidente que o porto de Getaria, con 16 barcos, ten o 70% de toda a cota que lle corresponde a Galiza”.
Fronte a isto, apostou po un novo reparto baseado en criterios sociais como o número de tripulantes e demandou do Goberno galego un plan de xestión da sardiña (unha das especies que captura o cerco, xunto á xarda, o xurelo e a anchoa)
