Foi unha decisión adoptada polo Comité de Empresa, apoiada por todas as centrais sindicais con representación agás CC.OO., que ratificou a asemblea de traballador@s do hospital privado Povisa. A partir do 17 de Marzo dará comezo unha folga con carácter indefinido para rexeitar os 14 despedimentos anunciados pola dirección do centro médico.
Así, 61 persoas das que compoñen o cadro de persoal de Povisa avalaron a greve, 48 posicionáronse en contra e 33 optaron pola abstención. Ademais do paro indefinido, durante a asemblea tamén se decidiron outras mobilizacións, como a protesta que terá lugar o vindeiro martes 4 de marzo diante dos Xulgados entre as 10.00 e as 12.00 horas para esixir o cumprimento das sentenzas que obrigan o hospital a repoñer a xornada laboral completa.
540€ por doente atendid@ durante 8 anos
O Comité rexeitou un recorte nos dereitos laborais de tod@s @s empregad@s como moeda de troco para non botar ninguén, unha achega da dirección que a presidenta do Comité, María Xesús Neira (CIG), cualificou de "chantaxe". Aliás, informou de que, para alén dos 13 despedimentos xa anunciados, unha enfermeira vén de recibir tamén a notificación do cesamento do seu contrato.
"O que pretenden é flexibilizar a xornada incumprindo o convenio colectivo", dixo Neira, recordando que a proposta de Povisa era estabelecer mudanzas nas quendas e nos horarios coa conivencia do Sergas, dependente da consellaría de Sanidade. Durante oito anos, o Sergas pagará a esta empresa privada até 540 euros por paciente atendid@. Máis do 75% des@s doent@s son derivadas a Povisa polo propio Sergas.
