Dominio de Gharaboto na Liga Atlántica de Billarda
O pavillón do IES de Poio foi escenario dunha nova xornada da Conferencia Rías Baixas da Liga Atlántica de Billarda na que a gran dominadora foi Gharaboto. O azul das súas cores ocupou seis das nove prazas de podio en xogo (tres absolutas, tres femininas e outras tantas infantís) e, con todo, no plano colectivo a escuadra marinense empatou a 98 puntos con Lúa de Forza de Sanxenxo e Valpaços Terra Quente ficou a tan só tres de distancia (95), rematando xa máis lonxe Corredoiras (82), Armadiña (67) e Rinoceronte (36). Individualmente, Piru, Álvaro e Hugo (todos eles membros de Gharaboto) coparon o podio absoluto, rachando Tania (Valpaços) co seu dominio na feminina, onde estivo acompañada no caixón por Lita e Aldara. Finalmente, entre as crianzas impúxose Xián, de Lúa de Forza.
photo_camera Tania, Lita e Aldara conformaron o podio na categoría feminina. (Foto: FGDA).