A desconexión é o novo luxo

A frase "offline is the new luxury" aparece de forma cada vez máis recorrente nas redes sociais. A idea de que a capacidade de desconectarse de internet estase a converter nun novo luxo vólvese recorrente nun mundo onde a conectividade é constante, afectando a todas as actividades e formas de interacción social. Tamén na forma de escoitar música. Aínda que pode parecer unha contradición nunha época dominada polas plataformas de streaming e a música baixo demanda, existe unha tendencia en crecemento que está a levar a moitos a abandonar estas plataformas de subscrición e as aplicacións para os teléfonos móbiles para volver a dispositivos dedicados con arquivos dixitais propios. A música en streaming ten moitas vantaxes. Poder escoitar calquera canción en calquera momento é algo que durante décadas tería resultado inimaxinable. Non sorprende que coa chegada de plataformas como Spotify, a maior parte do público apostase por dar o salto a esta nova forma de escoitar música, que semellaba traer consigo só puntos positivos. Foi co paso dos anos cando se comezaron a ver os inconvenientes. Nun primeiro momento, unha calidade de son inferior á de formatos anteriores como o CD, posteriormente as complicacións que trae este modelo para os artistas e nos últimos anos as desvantaxes para os usuarios, ao non ser os donos de ningunha da música que escoitan. Regreso ao analóxico Nestas páxinas xa repasamos como os formatos físicos e especialmente o vinilo estaban a volver gañar protagonismo. Todo isto ante un mercado crecente de persoas que buscaban posuír unha copia física dos seus discos favoritos, escoitalos sen ser interrompidos polas notificacións dos seus teléfonos e tamén para fuxir do risco de que un cambio de licencias por parte das discográficas supoña que ese álbum desapareza temporal ou definitivamente do streaming. Con todo, están comezando a xurdir outras tendencias que van máis alá do elemento nostálxico, ou polo menos en menor medida, por parte daquelas persoas que queren ser as donas da música que escoitan pero sen sentir a necesidade de voltar ao analóxico. A volta á desconexión non só é un reflexo dunha busca de simplicidade, senón tamén dunha resistencia ao modelo de negocio dos servizos de subscrición Este movemento, aínda que minoritario, está gañando tracción entre aquelas que valoran a independencia dixital e buscan unha experiencia de escoita máis personalizada e sen interrupcións. Mentres que os servizos de streaming ofrecen unha vasta biblioteca de cancións por unha tarifa mensual, os defensores da desconexión argumentan que a propiedade e o control sobre a música que escoitan ofrece unha liberdade que as plataformas de streaming non poden igualar. O feito de non depender dun servizo en liña tamén elimina as preocupacións sobre a dispoñibilidade de determinadas cancións ou os cambios de prezo das subscricións. Nesta nova tendencia, dispositivos como os iPods, que hai anos foron substituídos por teléfonos intelixentes, están a experimentar un sorprendente rexurdir. Mesmo se están a conformar comunidades virtuais de "modders" que, a través de modificacións, buscan actualizar estes dispositivos con novas baterías, maior capacidade de almacenamento e incluso novos sistemas operativos que lles permiten funcionar como nunha segunda mocidade. Menos limitacións Agora os discos destes reprodutores de música poden alcanzar varios terabytes de memoria, permitindo aos usuarios levar consigo enormes coleccións de música en formato de alta calidade sen necesidade de depender de conexións a internet ou de datos móbiles. Ademais, estas modificacións tamén inclúen melloras nas baterías, que agora poden durar durante días, adaptándose mellor ás esixencias dos usuarios actuais. Este movemento, que comezou nos Estados Unidos, xa cruzou fronteiras, e mesmo en Galicia xa non é raro atopar estes iPods 'tuneados' á venda nas principais plataformas de produtos de segunda man. O máis curioso é que os prezos destes dispositivos, en lugar de baixar debido á súa antigüidade, están a subir, impulsados pola demanda de aqueles que buscan un acceso á música fóra da nube. Esta volta á desconexión non só é un reflexo dunha busca de simplicidade, senón tamén dunha resistencia ao modelo de negocio dos servizos de subscrición. Moitos dos que optan por volver a dispositivos como os iPods argumentan que, ao posuír a súa música, están a escapar das limitacións e manipulacións dos algoritmos de recomendación das plataformas de streaming. En palabras de moitos dos usuarios dos foros deste movemento, tamén existe unha satisfacción especial ao construír unha colección musical propia, sen as distraccións nin as imposicións comerciais das plataformas dixitais.