O curso servirá, segundo a versión do Goberno galego, para que os participantes “aprendan da man de escritores e escritoras galegas de éxito”. A axencia literaria Rolling Words, promovida por Lourdes Díaz e coa que traballan autoras galegas como Xabier Quiroga, Arantza Portabales, Miguel Anxo Fernández ou Manuel Gago, encargarase da organización.
A compañía “brindará a súa experiencia no campo da edición e mesmo servirá de ponte ao profesionalismo cos talentos aínda por descubrir”. Na presentación da iniciativa, o director xeral de Políticas Culturais Anxo Lorenzo asegurou que os obxectivos do obradoiro serán “captar e exportar autores e autoras emerxentes, xerando unha comunidade dinámica onde os referentes compartan o seu coñecemento cos talentos aínda por descubrir”.
“En Galiza, a diferenza de noutros lugares, existe un certo baleiro en escolas de escritura creativa, especialmente naquela dirixidas a persoas adultas”, afirmou o escritor Javier Peña, un dos docentes canda Xabier Quiroga, Arantza Portabales, Miguel Anxo Fernández, Manuel Gago, Antón Riveiro Coello e Diego Giráldez. Porén, nos últimos anos en Galiza existe certo florecemento de obradoiros centrados, sobre todo, na poesía.
Nove sesións téoricas para 20 persoas -as prazas asignaranse por orde de matrícula- acollerán explicacións sobre o estilo, os xéneros narrativos, a creación de personaxes ou a estrutura e tempos da novela. Ademais haberá especialista do mundo editorial “que ofrecerán claves para adentrarse no mercado literario”.