'Salve discordia', o cuarto disco de Triángulo de Amor Bizarro, é -a xuízo da prensa musical española- o mellor disco estatal que se publicou o ano pasado, polo que recibiron a pasada noite o II Premio Ruido da Asociación de Xornalistas Musicais.
Entre os álbumes finalistas tamén atopamos a banda compostelá Novedades Carminha (con 'Campeones del mundo') e o vigués Iván Ferreiro (con 'Casa'), ademais doutras propostas como Love of Lesbian, León Benavente, Manel ou Silvia Pérez Cruz.
O cuarteto de Abanqueiro (Boiro) non para de recibir recoñecementos con este álbum, que xa foi elixido pola revista Mondosonoro como o mellor do ano, ademais de obter o sétimo posto na listaxe de Rockdelux que liderou Malandrómeda. A banda está moi consolidada no mercado estatal e conta cunha destacada presenza en países latinoamericanos como México.