O fútbol gaélico galego premia o deporte base

AAsociación Galega de Fútbol Gaélico decidiu esta semana outorgar o recoñecemento ao traballo técnico deste deporte na tempada anterior a dous adestradores moi vencellados co deporte base: Juan Manuel Vázquez (Club Auriense Campus da Auga F. G.) e David de la Torre (Estrela Vermelha F. G). O responsábel, dentro da entidade federativa, das Seleccións Galegas e coordinador xeral das Gaélico Escolas, Alexandre Sanmartín ‘Jano’, explica a Nós Diario que o xurado valorou “o labor que desenvolven nos seus territorios” na difusión deste deporte de orixe irlandesa. En concreto, no caso de De la Torre sinala a creación das escolas de Esquíos, no concello de Toén, e outra prevista na parroquia ourensá de Seixalvo -ambas as dúas na comarca de Ourense- e no de Vázquez, lembrou a iniciativa da escola deportiva do municipio de Boqueixón, na comarca de Compostela. O fútbol gaélico dá por superada a crise da Covid-19 catro anos despois Gaélico Escolas As Gaélico Escolas levaron esta modalidade deportiva ao longo da tempada 2023-2024 a 21 centros educativos da Galiza, nos que 2.153 nenas e nenos recibiron unidades didácticas. Para que esta iniciativa fose unha realidade, até nove clubs se integraron nesta iniciativa: Estrela Vermelha, de Compostela; Turonia, de Gondomar; Keltoi, de Vigo; Fillas de Breogán, da Coruña; e Auriense, de Ourense. “Desde que comezamos, despois da pandemia da Covid-19, estivo pensado como unha maneira de introducir o fútbol gaélico dentro dos centros de ensino”, expón Sanmartín, “os dous primeiros anos a través de unidades didácticas e a partir do terceiro creamos escolas deportivas”, agrega. Froito deste proxecto, a tempada pasada houbo tres escolas deportivas fóra do horario escolar (Vigo, Boqueixón e Toen) e “este ano poderían ser cinco”, sinala, pois están traballando para que se materialicen outras en Ourense e O Rosal (Baixo Miño). Ademais, organizaron torneos escolares en datas sinaladas, como en Nadal, cunha ducia de colexios. As Gaélico Escolas confirman a súa expansión e queren seguir medrando Auxe do gaélico galego "O ano pasado foi, en número de fichas federadas -unhas 450-, o mellor da historia para o fútbol gaélico galego", asegura o responsábel das seleccións galegas, "sobre todo se temos en conta que viñamos de pasar toda unha pandemia con todas as dificultades que iso trouxo para nós". A asociación conseguiu contar con 800 fichas recreativas, unha modalidade de nova creación. Sobre estas últimas, o responsábel da entidade aclara que naceron "pensando que sería interesante agregar persoas que queren participar en torneos puntuais ou nunha parte da tempada". Porén, a asociación e os equipos que a compoñen queren máis e están agora mesmo con campañas para captar deportistas. "O mes de setembro é o clásico para buscar novas incorporacións e nós, como asociación, tamén colaboramos puntualmente con eles", apunta. O tamén adestrador nacional deste deporte sinala que todos os clubs están buscando xogadores e xogadoras, mais especialmente pon como exemplos os equipos femininos dos Lorchos (no Barbanza) e Lavandeiras de San Simón (en Vigo). O gaélico da Galiza pon a mira nos Campionatos Ibéricos A base do gaélico na comarca de Compostela David de la Torre xa leva uns anos practicando e difundindo o fútbol gaélico na comarca de Compostela. Recoñece a Nós Diario que recibiu a noticia do galardón "con sorpresa" e tamén "con orgullo". Sabe que compite día a día "con outros deportes máis maioritarios, polo que tes que facer moito traballo de campo coas rapazas e cos rapaces". Busca que "non se perdan oportunidades de xogar" nun labor "do día a día", algo que ao final "agradecen". Entre os éxitos que conseguiu, o último foi vencer na competición "na casa", preparatoria para o European Féile de categoría infantil e cadete. Foi en marzo e participaban, ademais do Boqueixón, os equipos de Esquíos F. G., IES Xelmírez I, Keltoi Montecastelo e O Resío Turonia. Despois, na disputa da III edición do European Féile de fútbol gaélico realizado en Vigo no Colexio Montecastelo, Boqueixón conseguiu chegar até a final. "Na escola tento explicar como é este deporte da maneira máis sinxela posíbel", indica De la Torre. Neste sentido incide no seu "dinamismo" por ser algo semellante "a xogar ao fútbol coas mans, algo que poden asimilar doadamente, e engado que teñen máis posibilidades de marcar goles". Recoñece que non hai "unha fórmula que garanta a continuidade neste deporte despois de pasar por esta experiencia". Con todo, busca transmitir que hai "moitas posibilidades de seguir e mesmo de participar en campionatos e torneos internacionais, algo que noutros deportes non terían". O prestixioso torneo 'Feile' de fútbol gaélico chegará á Galiza Gaélico desde Toén Juan Manuel Vázquez leva sete anos vencellado ao fútbol gaélico e ao Auriense F. G. Tamén viviu "con sorpresa" o recoñecemento ao seu traballo no rural da comarca de Ourense. Hai dous anos e medio propuxo ao CEIP de Toén introducir o fútbol gaélico como actividade extraescolar, aproveitando a chegada da súa filla ao centro. "Querían retomar o dinamismo despois da pandemia e continuar co seu espírito activo", relata este adestrador e xogador. Á boa acollida de inicio da proposta, cun incremento cada tempada de participantes, pasando de oito até vinte e unha antes do verán, "nada mal se temos en conta que o colexio ten 100 rapaces e rapazas", sumouse a necesidade de que o club ourensán "tivese unha escola base". Agora, na parroquia ourensá de Seixalbo, terá lugar a presentación da escola deportiva o 20 de setembro. O seu método para "engaiolar a cativada" no fútbol gaélico é demostrar que "é sinxelo e moi divertido de xogar e ver". Unha idea que está a callar pouco a pouco tamén na mesma sociedade galega.