As altas temperaturas deste verán na Galiza aumentaron o risco de problemas de saúde en determinados postos de traballo.
Desde CCOO Industria de Vigo, ante esta situación climatolóxica, presentaron unha denuncia ante a Inspección de Traballo e Seguridade Social (ITSS) polo que entenden son “condicións extremas que se están a vivir nos estaleiros e que supoñen un risco inminente e reiterado debido ás altísimas temperaturas”.
A través dun comunicado, alertan que neste sector, onde traballan miles de persoas, hai labores que se realizan “en espazos confinados, en dobres fondos, ou os traballos a pleno sol, cargados con material, fundas, roupa ignífuga, mandil de soldadura, luvas, casco, pantalla facial e máscaras”.
Esta circunstancia fai “que as temperaturas corporais dos traballadores e traballadoras se disparen, supoñendo un risco para a saúde, en forma de caídas, desmaios ou golpes de calor que poden rematar inclusive coa morte”.
CCOO critica que as direccións das empresas “dan prioridade á produción e aos seus beneficios a custa da saúde do conxunto da clase traballadora e continúan sen tomar medidas”, polo que urxen, como primeiro paso, implantar a xornada continua de 7 a 15 horas e protocolos para minimizar os riscos.
