Galiza segue no furgón de cola do Estado español en canto a salarios, como vén de ratificar a Enquisa Anual de Custe Laboral 2014. O soldo bruto dunha persoa que traballa en Galiza é de 19.854 euros anuais, unha cifra que superan todos os territorios do Estado agás Canarias e Extremadura, os únicos con peores rexistros que o noso país.
O salario medio bruto español é de 22.605 euros ao ano, o que supón 2.751 euros máis que o galego. A fenda ensancha considerabelmente se a comparación a facemos con aqueles territorios con soldos máis altos, como Madrid ou Euskadi. Así, o salario en Madrid (27.172 euros) é 7.318 euros máis que aquí, e en País Vasco esa diferencia é de 6.000 euros anuais. Mais Galiza tamén ten peores soldos brutos que os territorios da súa contorna, como Castela-León ou Asturies.
Confirmación
Os dados da Enquisa anual de custo laboral veñen se sumar aos publicados nos últimos meses e que inciden na importante fenda existente entre Galiza e o Estado español e Europa en canto a desenvolvemento económico. Cómpre lembrar que as riqueza por habitante en Galiza segue afastada tanto do promedio europeo coma do español, como confirmaron en xuño pasado os dados de Euostat, a Oficina de estatística comunitaria. Se a media de renda per cápita na UE poñémola nun baremo de 100, Galiza fica no 83% desa riqueza, o que significa 17 puntos menos. Por comparar cos territorios da nosa contorna, Castela-León acada o 89%, Asturias o 84% e Cantabria o 86 por cento. Se a comparación facémola con Euskadi (122%), Madrid (128%) ou Catalunya (111%) a diferenza é abismal. De feito, o PIB por habitante en Galiza fica lonxe tamén da media do estado español. Se este é 100, nós estamos no 94, seis puntos menos.
