Sargadelos fechou 2015 cun beneficio de 70.000 euros, agarda incrementar beneficios neste 2016 e en 2017 iniciar novas liñas de produto, abrindo as portas a crear unha 'marca branca'. "Podería ser", dixo o conselleiro delegado de Sargadelos, Segismundo García, que expuxo estas liñas na súa comparecencia para dar conta de que sairon do concurso de acredores, cunha débeda de 5 millóns de euros, á que deberán facer fronte nun prazo de entre 5 e 12 anos.
A empresa, e as divisións inmobiliarias das entidades financeiras, pon á venda edificios emblemáticos, como a tenda que posúe en plena zona vella compostelá ou o edificio do IGI, o Instituto Galego de Información, na estrada que une a capital de Galiza co aeroporto de Lavacolla. O IGI foi recado por Díaz Pardo, un dos refundadores de Sargadelos, en 1977. A taxación profesional deste inmble é de 7 millóns de euros, e o da tenda compostelán, 4. Mais Saegadelos está aberto a rebaixar os prezos.
García considera que co convenio asinado -con diversas quitas na débeda por valor de máis dun millón de euros- hai posibilidade de que a empresa sexa “viábel”, engadindo que para iso as cousas teñen que se facer “ben”. Sargadelos tiña poucos acredores tradicionais, que aceptan con este acordo un 50% de quita da súa débeda (menos do 20% dos créditos dos bancos eran ordinarios). No caso da parte privilexiada, a maioritaria, a quíta varía en cada un dos casos - tanto en bancos coma na Seguridade Social e na Axencia Tributaria - entre ningunha, o 30% e o 50%, segundo explicou o conselleiro delegado.
Despedimentos
García foi moi crítico cos sindicatos na súa comparecencia, afirmando que “estamos aquí malia eles”. Entre as súas 2 plantas a empresa ten algo máis de 100 traballadores. O ERE supuxo 70 despedimentos.
