O adianto electoral de Macron deixa Le Pen acariciando o Goberno francés após a primeira volta das lexislativas

De forma inédita e cumprindo as predicións das enquisas, a extrema dereita impúxose na primeira volta das eleccións á Asemblea Nacional de Francia que decorreron o domingo, e cuxos resultados definitivos foron trasladados a segunda feira. Os datos supoñen un fracaso para o presidente, o conservador liberal Emmanuel Macron, que disolveu a Cámara Baixa e adiantou os comicios tras a vitoria da ultradereita no territorio nas eleccións ao Parlamento Europeo deste mes. Entre a prensa internacional reitérase a responsabilidade do mandatario no acontecido. O xornal La Libre Belgique cualifícao de “trampolín da extrema dereita” e cúlpao dunha “caída vertixinosa cara ao descoñecido”. Con todo, Reagrupación Nacional (RN), a forza de Marine Le Pen, e os seus aliados aínda están lonxe de facerse coa maioría absoluta á que aspiran, e que dependerá dos resultados da segunda fase das votacións este domingo, 7 de xullo. A información do Ministerio de Interior francés detalla que das 577 circunscricións, cada unha das que elixe un representante na Cámara Baixa, só en 76 a primeira rolda ditou sentenza. 39 foron para a RN (un para a facción dos Republicanos, LR, que se aliou coa ultradereita), 31 para a Nova Fronte Popular (NFP) e só dous para Xuntos pola República, a coalición liderada por Renacemento, o partido de Macron. Tamén gañou un escano a facción de LR que se negou a pactar con Le Pen, un disidente do Partido Socialista (PS) que non se presentou baixo a bandeira da NFP e dúas candidaturas de “centro diverso”, segundo reflicte o Ministerio. En 190 distritos, os resultados dispuxeron unha pugna entre dúas candidaturas o 7 de xullo, cun elevado peso dos duelos entre candidaturas de RN e da NFP, en 306 accederon á rolda final tres persoas e en cinco até catro. Após decorrer nos comicios de 2022 apenas oito triangulares -disputas na segunda volta entre tres candidaturas-, a cifra disparouse da man da elevada participación, que facilitou alcanzar 12,5% do apoio do censo, o díxito a partir do que unha persoa que logre o terceiro lugar na primeira volta se pode clasificar. De feito, o 66,7% do domingo é a cifra de participación máis alta na primeira volta dunhas lexislativas desde 1997. Inicia en Francia unha campaña electoral marcada pola posíbel vitoria da extrema dereita Malia a primeira posición da RN, se temos en conta os seus votos en solitario (29,25%) -ao tempo a facción de LR que a apoia fíxose con 3.9%- perdería dous puntos en relación ás eleccións ao Parlamento Europeo. Por detrás aparece a NFP con 28% e Xuntos, con 20%. Pola súa parte, o grupo de LR en contra do pacto con Le Pen alcanzou 6,5%. En teoría, tanto a RN como a NFP teñen posibilidades de lograr na segunda volta unha maioría absoluta que lles permita gobernar, porén a ultradereita parte con vantaxe, ao liderar o reconto en 260 circunscricións -sen contar as 39 que xa aseguraron-. En 180 delas superou 40%. Entrementres, a NFP liderou 128 distritos amais de nos que xa se impuxo. Xuntos encabeza 68. Neste contexto, as decisións das forzas políticas sobre a quen apoiar na segunda volta serán determinantes. Frear a ultradereita A primeira en marcar posición foi a esquerda. Jean-Luc Mélenchon, o principal activo político da Francia Insubmisa (LFI), integrada na NFP, asegurou que “o país debe decidir se vai acentuar as súas diferenzas ou unirse polo ben común”, incidindo en que “na segunda volta é a NFP ou é a RN” e anunciando que retirarían todas as candidaturas que chegaran á segunda volta en terceira posición co fin de evitar a división de votos para frear a extrema dereita. “En ningunha parte permitiremos que gañe a RN”, reiterou. As mesmas instrucións foron replicadas por outras forzas da NFP. En paralelo, a parte de LR non aliada con Le Pen transmitiu que non dará ningunha directriz e que non retirará as súas candidaturas. En última instancia, e tras unha campaña baseada en intentar equiparar a ultradereita coa coalición progresista ou con parte dela, Xuntos non foi quen de consensuar unha posición. Macron instou a crear “unha unión ampla claramente democrática e republicana”, e o seu primeiro ministro, Gabriel Attal, remarcou neste sentido que a extrema dereita está “ás portas do poder” e sinalou que as candidaturas da alianza que accederan á segunda volta en terceira posición contra persoas da RN se retirarían para impedir a división das papeletas. A pesar destas declaracións, un alto cargo de Renacemento comunicou ao xornal Le Monde que, malia que esta instrución tamén se aplica cando a RN se enfronta a unha candidatura de LFI, analizarán caso por caso para avaliar se a candidata ou candidato “é compatíbel cos valores republicanos”, insistindo en que a formación de Mélenchon é “claramente inimiga dos valores da República”. A Nova Fronte Popular mide forzas con Le Pen na primeira volta das lexislativas francesas Edouard Philippe, líder de Horizontes, integrada en Xuntos, reforzou esta posición e demandou ás súas candidaturas que abandonen para facilitar que non sexan escollidas persoas de RN ou LFI. Sexa como for, no seo do Executivo e de Renacemento o debate segue aberto, pois mentres o ministro de Industria e Enerxía, Roland Lescure, exixiu “bloquear a extrema dereita” por calquera vía o titular de Economía, Bruno Le Maire, fixo énfase en que perante a ausencia dunha candidatura propia habería que optar “por un candidato do campo socialdemócrata”, mais non de LFI. A confusión sobre a posición do oficialismo impulsa a ultradereita Após beneficiarse da fronte republicana contra a ultradereita en comicios anteriores, ao recoller o apoio de persoas progresistas, a decisión da coalición de Macron de condicionar o apoio á NFP incrementa as opcións da RN de facerse coa maioría absoluta, o que foi criticado pola NFP. Apenas a esquerda mantivo a súa posición histórica ao respecto malia que unha vez máis verase prexudicada a nivel numérico posto que os progresistas ficaron na terceira praza en 129 distritos, á vez que Xuntos fíxose co terceiro lugar en 90 demarcacións. O certo é que mentres que as candidaturas progresistas informaron en masa dos abandonos -o prazo para rexistralos expira hoxe ás 18 horas-, incluso en casos nos que ocupou a segunda posición ante a negativa de candidaturas conservadoras a retirarse, múltiples aspirantes da coalición de Macron anunciaron que se manterían en liza logo de obter a terceira praza entre distintas xustificacións. Francia, a crise permanente Á espera de que ao finalizar o prazo haxa datos definitivos, a prensa francesa estima que, despois dos anuncios de retirada, os 190 enfrontamentos a dous que resultaron das urnas eleváronse a 364, e o número de triangulares diminuíu de 306 a 133. Retiráronse 177 candidaturas: 122 progresistas, 54 de Xuntos e unha de LR. Pola súa parte, as forzas soberanistas estarán na segunda volta en tres das catro circunscricións de Córsega, e a vasca EH Bai liderou a primeira fase no principal distrito de Iparralde. No que atinxe á Catalunya Nord, a extrema dereita dominou as votacións.