'Fala, memoria': Venezuela após as eleccións presidenciais

As eleccións venezolanas do pasado 28 de xullo e as tácticas de descrédito e desinformación da oposición dan forma a un país e un goberno inexistente. Fala, memoria é o título da autobiografía do escritor ruso exiliado Vladimir Nabokov. Nela o que menos importa son os temas variados da súa existencia e o que máis os detalles, os seus "queridos detalles". Co gallo da agresión continuada ao goberno venezolano por parte de todos os medios de comunicación internacional, os gobernos da Unión Europea (UE) e Estados Unidos (EEUU), máis certos Estados veciños que xogan á corrección política internacional mesturada cun "progresismo" barato que non leva a ningures, lembrei os "detalles" que fan única a revolución bolivariana e arrepiante a oposición ao "réxime". En primeiro lugar, os candidatos. Non sei se alguén se decatou da composición racial do equipo de fútbol de Francia na Eurocopa e da composición racial dos seareiros franceses que berraban nos estadios alemáns. Son dous equipos distintos, dous mundos distantes. Quen representa a quen? Cada un represéntase a si mesmo? Demostrar o indemostrábel A historia da independencia de América Latina é a historia dunha loita de clases; a dos burgueses brancos americanos contra o poder político branco, pobre e peninsular. As outras clases representadas por indios, mestizos e negros serviron de carne de canón e sufriron até ben entrado o século XX a servidume do poderoso. O modelo da clase alta, branca ou branqueada, perpetuándose no poder republicano, recibiu o lapote da revolución mexicana pasando por Bolivia, Cuba, Nicaragua, Venezuela, o Perú de 1968 do xeneral Velasco Alvarado ou o Chile de Allende. Exíxeselle a este Goberno bolivariano o que nunca se lle exixiu a outro en ningures Vemos as caras de Hugo Chávez ou Nicolás Maduro e as dos seus opoñentes: María Corina Machado e Edmundo González (ou, noutras eleccións, Leopoldo López, Henrique Capriles Radonski, Henrique Salas Römer, Gerardo Blyde, etc.) e a memoria fálanos da confrontación aínda existente entre os brancos e o pobo mestizo que dende 1492 viviu unha vida prestada servindo a outros e que, aínda tendo o poder político, non tiña o poder económico. Exíxeselle a este Goberno bolivariano o que nunca se lle exixiu a outro en ningures. Ten que demostrar o indemostrábel. Insúltano por defender a legalidade que os media internacionais, gobernos e oenegués cualifican de represión. Intentos de golpe de Estado con montaxes preparadas e mortes sementadas polos propios golpistas. Colaboración por parte de España con medios materiais para o golpe de Estado de 2002. Morte de Chávez en estrañas circunstancias. Sabotaxes eléctricas e informáticas que impiden a vida normal dos cidadáns venezolanos. Boicot á venda internacional do único e principal produto de exportación: o petróleo. Sabotaxes indiscriminadas a refinarías e hidroeléctricas. Recoñecemento do autoproclamado presidente Juan Guaidó. Outorgamento da cidadanía española por carta de natureza aos principais líderes violentos da oposición venezolana. Utilización da embaixada española en Caracas como sucursal da oposición venezolana. Embargo de todos os bens soberanos monetarios en divisas e ouro, industriais (a rede de gasolineiras e refinarías públicas venezolanas en Estados Unidos, Citgo, está administrada por Juan Guaidó e a piques de ser liquidada pola xustiza estadounidense por débedas). Reservas de petróleo A opositora mexicana Xóchtil Gálvez instou, instantes despois de perder as eleccións contra Claudia Sheinbaum, a que marchasen todos os mexicanos aos centros de votación para evitar o "roubo" e a "fraude" que se estaba a cometer. Alegaba que nas enquisas ela era a primeira opción entre os votantes, igual que Marine Le Pen nas lexislativas francesas (que quedou terceira) e ninguén alegou nin roubo nin exixiu que os candidatos gañadores demostrasen a súa "proba de sangue" ante a Inquisición. Venezuela ten, hoxe en día, as maiores reservas comprobadas de petróleo (proven reserves, en inglés), 300.878 millóns de barrís, segundo Petróleos de Venezuela, S.A. (Pdvsa). Esa tentadora cifra para o veciño do norte, que polo momento é autosuficiente en enerxía, é razón suficiente para exixir o inexixíbel ao Goberno bolivariano, alentar magnicidios, utilizar a mentira como arma política e de desestabilización e argallar fraudes onde non as hai. Por iso é bo que fale a memoria, que non se centre nos temas e que faga brillar os detalles.