Venezuela: unha declaración histórica de cinco xeracións

O 2 de xullo, no Teatro Teresa Carreño de Caracas, 2.500 persoas representantes de cinco xeracións con presenza revolucionaria na política de Venezuela aclamaron como o seu candidato á presidencia, en nome de millóns de compatriotas, Nicolás Maduro. Cinco xeracións que poden definirse así: a xeración precursora, que vén das loitas dos anos 60, 70 e 80 e aínda segue activa. A xeración fundadora, que acompañou o comandante Chávez na creación do proxecto bolivariano (o propio Maduro é un bo representante dela). A xeración de ouro, así bautizada por Chávez, que é a que tiña entre 20 e 30 anos nos inicios do seu goberno. A xeración intermedia, que son os mozos e mozas que se foron incorporando despois e que hoxe teñen aquela idade. E a xeración xenial, formada polos máis novos, que hoxe día insurxen no campo político cunha forza extraordinaria. Nese acto, o comandante da revolución Luis Reyes Reyes, leu unha " declaración política de cinco xeracións, unidas como os dedos da man", que está a ser asinada por millóns de persoas en todo o país. Aínda que este espazo non permite reproducila completa, é importante anotar unha boa parte, como expresión directa da vontade dun pobo. Unha mirada fina poderá extraer dela o espírito dos grandes obxectivos da revolución bolivariana convertidos en aspiracións políticas irrenunciables. Os preceptos de Chávez "Nos nosos cinco estratos de tempo vivido e por vivir, proclamamos que, a pesar das diferenzas cronolóxicas, nada hai que nos divida nesta batalla histórica. Senón que, pola contra, é máis ben a propia vida a que nos enlaza, no tempo actual, ata converternos nunha soa forza". Venezuela debe continuar como nación independente e soberana, impulsando un mundo pluripolar sen imperialismo nin colonialismos Forza que ha de ser vitoriosa, nesta conxuntura, como en cada outra que se nos presente, lembrando sempre a instrución do Comandante Chávez: unidade, loita, batalla e vitoria!, para que Venezuela continúe como nación independente, soberana, e non se dilúa nas agonías dun mundo que declina, senón que continúe impulsando con valentía o mundo pluripolar que hoxe nace: pacífico, próspero, sen hexemonías coercitivas. Vale dicir, un mundo sen imperialismo nin colonialismos. Tamén para que, no interno, nosa Venezuela bonita, apoiándose na unidade do pobo do que formamos parte, logre avanzar sobre os Obxectivos Históricos deseñados por Chávez no Plan da Patria, coas sete Grandes Transformacións que expuxo Nicolás Maduro xunto ao pobo, para o período 2025-2030. O noso compromiso, que como tal asumimos hai tempo, implica a defensa dalgunhas decisións políticas, tanto no curto como no longo prazo, que cómpre subliñar especialmente: —Que na nosa Patria non haxa, nunca máis, campo aberto ao fascismo, nin á representación interna do neocolonialismo nin do imperialismo. —Que o poder político se manteña por sempre nas mans do pobo soberano. —Que a construción do socialismo lle dea rumbo e sentido a todas as nosas accións políticas, sociais, económicas, culturais. Que naza potente desde as entrañas do pobo o Estado Comunal. Como expresión suprema do Estado Democrático e Social de Dereito e de Xustiza. —Que o protagonismo dos traballadores e traballadoras na produción e na condución da sociedade, garanta unha economía de calidade, humanamente digna, sen explotación nin exclusión de ningún tipo. —Que a nosa liberdade descanse na conciencia do pobo, produto do coñecemento xeneralizado. —Que toda acción de goberno, en calquera dos seus niveis, teña como sur (porque o noso norte é o sur) a nosa transformación nunha sociedade próspera, que deixe atrás para sempre a pobreza e a desigualdade. —Que a razón amorosa, con todo o que ela implica, guíe os nosos pasos na contribución á causa humana e a paz entre os pobos. —Que as nosas culturas, constitutivas da nacionalidade, diversas e complementarias como son, florezan con alborozo, todas e cada unha delas, participando cos seus poderes creadores, na construción do porvir. —Que a nosa Forza Armada siga sendo, por sempre, pobo soldado, ao servizo das mellores causas, entre as cales se atopa a unión da Nosa América e a garantía da súa independencia definitiva. Razóns todas elas, entre outras de igual significado, polas cales recoñecemos e apoiamos como o noso candidato presidencial, integrante da xeración fundadora pero candidato das cinco xeracións ao compañeiro traballador Nicolás Maduro Moros, presidente vitorioso da paz, protector do pobo e construtor de prosperidade nos tempos máis difíciles, como garantía de que as nosas lexítimas aspiracións e soños concretaranse en realidades.