Axar.- (Ademais de significados xa rexistrados) Levantar o voo as aves. Tamén se di cando o vento eleva calquera cousa. Exemplo de uso: “Non colgues a roupa fóra, que che vai axar co vento”.
Lugar de escoita.- Carbeiral- Bardaos (San Sadurniño).
Fonte.- Avelino Sanjurjo Beceiro.
Outros apuntamentos.- A fonte informa que lla oíu á súa avoa nada en 1906 e residente na parroquia indicada.
Calloubeira.- (Ademais de significados xa rexistrados) Dise do caldo cando se fai apurado e de calquera maneira. Caldufada.
Lugar de escoita.- Zona de Meira (Lugo)
Fonte.- Andrés Lombardía Crespo.
Outros apuntamentos.- Polo xeral calloubeiro/a aplícase ao mal cociñeiro/a que fai calloubadas ou caldufadas ou caldoadas, pero polo que se ve na zona referida é o resultado o que se recibe ese nome.
Equinocio.- (Ademais do significado coñecido) Lea monumental ou desastre de calquera tipo, especialmente natural. Exemplos: "Fixo un equinosio", "Foi un equinosio".
Lugar de escoita.- San Mamede de Carnota (A Coruña).
Fonte.- Mar Llinares García.
Outros apuntamentos.- Pronunciada con seseo, como se pode ver nos exemplos.
Fuliqueiro.- Persoa disfrazada de calquera maneira, coa cara cuberta cun trapo ou careta e roupa vella. Tamén se aplica á persoa que anda mal vestida.
Lugar de escoita.- Navia de Suarna.
Fonte.- Marcos Seixo.
Oranghe.- Refresco con gas, de calquera sabor. Exemplo: “Ponlle ao neno un vaso de oranghe de limón coa merenda”.
Lugar de escoita.- Burela (Mariña luguesa)
Fonte.- Mario Ferreira.
Outros apuntamentos.- Apunta a fonte que a palabra, tomada directamente do inglés, é usada unicamente polas persoas maiores. Deberon aprendela das etiquetas destas bebidas, aínda que a empregan para calquera sabor.
Prouso, a.- De calquera xeito, ao chou.
Exemplos: “Botar o móbil a prouso no bolso”./ “A area viña a prouso no camión”.
Lugar de escoita.- Sta. María de Covelo (Covelo).
Fonte.- Sé Anxo Rosales González.
Xingardía, a.- De calquera maneira, a rumbo. Exemplo: “A terra do leirato non semellaba ter bo tempeiro e sementei a xingardía”.
Lugar de escoita.- Cabeza de Manzaneda (Ourense).
Fonte.- Benxamín Fernández Yáñez.
