O Consello de Ministras e Ministros aprobou esta segunda feira unha serie de anteproxectos de lei para a cesión definitiva da xestión do Imposto sobre o Depósito de Residuos en vertedoiros, a incineración e a coincineración de residuos territorios do Estado español, entre eles a Galiza.
A decisión trasladouna a portavoz do Goberno español e ministra de Política Territorial, Isabel Rodríguez, tras a reunión do Consello.
A aprobación realizouse após a solicitude por parte do Goberno galego para que a cesión do tributo tivera lugar de maneira prioritaria, segundo se especifica nas referencias do Consello. Ademais, o procedemento cumpre co marcado no Estatuto de Autonomía e na Lei de Financiamento das Comunidades Autónomas.
Acordo do mes de xullo
O Ministerio de Facenda e Función Pública e os territorios acordaron o pasado mes de xullo impulsar a cesión do imposto sobre depósito de residuos en vertedoiros -que entra en vigor o 1 de xaneiro de 2023- mais coa idea de que estes poidan ir asumindo "con flexibilidade" e segundo a súa propia demanda a xestión.
Segundo lembrou a ministra de Facenda e Función Pública, María Jesús Montero, algúns territorios tiñan impostos moi parecidos no conxunto do Estado español.
"Algunhas teñen présa por asumilo porque tiñan un moi parecido no seu territorio e outras manifestaron que non constitúe unha prioridade neste momento", explicou a ministra.
A norma que lle chegou ao Goberno español desde o Congreso dicta que se facilite aos territorios para que asuman as competencias de xestión en torno a este imposto, que responde ao afán da Unión Europea por nas cuestións que teñen que ver coa transición ecolóxica e a fiscalidade medioambiental.