Após meses de lanzar, por activa e pasiva e sen resultado, mensaxes e chiscadelas a Podemos para sumar forzas, IU cansou. A marcha da que era candidata en Madrid, Tania Sánchez; as tensións internas da federación e as últimas invectivas de Pablo Iglesias (“Vívese moi cómodo sendo un partido bisagra do PSOE, sendo fiel aos teus principios e sabendo que vas ser minoritario") fixeron rebordar a paciencia de Cayo Lara. O líder de IU acusou a Podemos de lanzar unha “OPA hostil” sobre Izquierda Unida. “Queren os votos do PSOE e os cadros de IU”, dixo.
Nunha liña contraria á do candidato de IU ao Goberno español, Alberto Garzón, Lara cargou contra o novo partido. Acusou os líderes de Podemos de ter “só os principios de Grouxo Marx: estes son os meus principios, se non vos gostan, teño outros”.
Lara mesmo emprazou Monedero (un dos fundadores de Podemos) a “dar explicacións” polas súas pretensas irregularidades con Facenda e os depósitos que ten en contas bancarias. Cargos de IU xa afirmaran hai uns días que o seu euro-deputado Willy Meyer demitira “por menos”.
