Era cuestión de tempo -o ruxe-ruxe leva meses na rúa- que as tres forzas da oposición concretasen a moción, unha decisión da que xa se viña falando cando menos desde finais do ano pasado, logo de o alcalde do BNG, Juventino Trigo, ter retirado as competencias aos cinco edís –tres do PSdeG e dous de Somos Fene- que até agosto facían parte do goberno local, canda os catro concelleiros dos nacionalistas e a representante de Esquerda Unida, polos incumprimentos pactados para a elaboración dos orzamentos.
Os impulsores da moción de censura tiveron que dar marcha atrás na súa decisión e retirar a moción após a secretaria lles comunicar que unhas horas antes recibira por vía telemática unha certificación na que o responsábel de Organización do partido Participación Democrática Directa –matriz de Somos Fene-, Ramón Mouriño, informaba do acordo adoptado na noite de onte pola Coordinadora Nacional da formación polo cal se lles retiraba aos edís de Somos Fene, César Castro e Xosé Manuel Rodríguez Bastida, a representación de PDD na corporación municipal de Fene, solicitando asemade que pasen a a seren considerados concelleiros non adscritos.
O escrito remitido por PDD explica que o partido se desvincula de “calquera actuación que realicen estas persoas” e insiste en que “as candidaturas promovidas por PDD teñen como obxectivo principal promover a participación dos veciños nos concellos e mudar os xeitos de facer política, polo que á vista das novas recibidas dunha negociación para unha posíbel moción de censura, non podemos amparar actuacións que vaian en contra do espírito e principios que inspiraron estas candidaturas”.
A negociación da moción non só está a provocar marexada en Somos Fene. A semana pasada, o secretario xeral do PSdeG de Fene, Joaquín Ayala –tamén concelleiro- e o responsábel de Organización, José Pico, presentaron a súa dimisión dos seus respectivos cargos orgánicos como medida de protesta pola preparación da moción de censura, que contaría co visto e prace dos outros dous concelleiros socialistas na corporación fenesa.
A corporación de Fene constituíuse en xuño de 2015 con 7 concelleiros do PP, 4 do BNG, 3 de PSdeG, 2 de Somos Fene e 1 de Esquerda Unida.
