A portavoz nacional do BNG e candidata á Presidencia da Xunta da Galiza, Ana Pontón, reclamou esta quinta feira desde Burela á Xunta da Galiza e Goberno español que abandonen dunha vez por todas a súa “confrontación estéril e inútil” na xestión da crise dos pellets e se poñan a traballar “man a man” para que haxa “máis medios e máis recursos” para retirar a marea plástica do litoral galego, segundo recalcou, “a primeira prioridade” nestes momentos.
Despois dun encontro coas xogadoras do Burela-Pescados Rubén de fútbol sala, Pontón insistiu en que a máxima prioridade agora mesmo é a limpeza das praias e a retirada dos pellets plásticos contaminantes que están chegando canda vez a máis puntos da costa galega e criticou as liortas nas que seguen inmersos os executivos galego e estatal.
“A primeira prioridade ten que ser a limpeza das praias e a cidadanía galega o que reclama ás Administracións non é nin un ‘pim pam pum’ partidista nin unha confrontación estéril, senón que traballen man a man, coordinadamente, para que canto antes se poda retirar toda esa marea de plásticos”, afondou, para advertir a continuación que “o problema segue aí” e, dadas as previsións, “poden chegar máis pellets nos próximos días”.
De igual modo, a líder nacionalista reclamou ao Executivo de Alfonso Rueda que actúe “coa máxima transparencia” porque “é evidente que non se pode seguir actuando como até agora”, cunha Xunta que actuou “tarde e mal” e que, na vez de pórse á fronte do problema, está inmerso nunha estratexia “na cal o único que fai é intentar buscar culpábeis”.
Pontón asegurou observar “con moita preocupación” como o Goberno do PP está repetindo “o mesmo manual” que durante o Prestige, cun , o mesmo modus operandi” co que primeiro negou o problema, despois intentou minimizalo, intentou responsabilizar a outras Administracións e, por último, actuando con “falta de transparencia, con opacidade e sen a seriedade e o rigor que merece unha crise destas características”.
Neste sentido, contrapuxo a actitude da Xunta á de outros gobernos como o vasco, “que sen ter nin un só pellet nas súas praias, xa está activando os niveis de emerxencia e intentado atallar o problema”. Para a portavoz do Bloque, este é un momento no cal os Executivos teñen que estar á altura dos galegos e das galegas porque “a capacidade dun goberno mídese en situacións críticas como a que estamos vivindo nestes momento e, até o de agora, vimos a un Goberno que non estivo á altura”.
"Tomar en serio o problema"
“O que lle reclamamos á Xunta é que tome realmente en serio o problema”, indicou para engadir que resulta evidente que tanto Goberno galego como español “non foron capaces de calibrar a importancia da vertedura que se estaba producindo” e teñen que rectificar e pórse a traballar man a man porque o máis importante é retirar a marea plástica do litoral galego. “O pim pam pum partidista non lle vale para nada a este país e desde o BNG reclamamos altura de miras”, concluíu.