O ministro español de Transportes e Mobilidade Sostíbel, Óscar Puente, anunciou esta sexta feira o cesamento do subsecretario de Estado, Jesús Manuel Gómez, e do xefe de persoal de Adif, Michaux Miranda, pola súa condición de investigados no 'caso Koldo'.
"Tendo en conta a situación procesual na que ambos se atopan, espero que o entendan", indicou Puente no Senado durante a súa comparecencia extraordinaria na Comisión de Transportes e Mobilidade Sostíbel, convocada a pedimento do PP para que explicase os resultados da auditoría que encargou tras coñecerse o presunto caso de corrupción e se ía tomar medidas respecto diso.
O ministro subliñou que da auditoría interna realizada por Transportes, "prodúcese unha perda de confianza que desemboca na decisión" de cesar a ambos, aos que o xuíz da Audiencia Nacional que instrúe a causa ten previsto interrogar en setembro como investigados.
"Con iso non pretendo prexulgar nin realizar ningún tipo de valoración que teña que ver con cuestións que só incumben aos tribunais de xustiza. A miña decisión baséase exclusivamente en aspectos meramente administrativos que se puxeron de manifesto con rotundidade na auditoría practicada", explicou.
Así mesmo, Puente defendeu que a decisión de cesar a ambos os cargos non a tomou porque o xuíz lles chamou a declarar ou porque o pidan os medios de comunicación, senón porque entende que é "o mellor para o Ministerio" e para os propios investigados, que "a partir de hoxe terán unha oportunidade mellor para defenderse de como o viñeron facendo no foco da propia opinión pública todos os días", dixo.