María Vázquez. A mestra na memoria

María Vázquez Suárez foi, segundo as crónicas da época, a primeira muller en falar en público en Miño. Tamén unha persoa comprometida non só politicamente coa II República e as ideas socialistas, que defendía como afiliada á UXT e militante do PSOE, senón tamén como feminista e mestra dunhas nenas ás que ofreceu os máis avanzados métodos educativos do seu tempo. Por todo iso non resulta sorprendente que o seu sexa un deses nomes silenciados, ocultados polo paso do tempo e o accionar do fascismo español, que lle arrebatou a vida en 1936.