Diego Soto, egresado en Exeñaría Técnica Agroalimentaria e investigador da Universidade de Vigo, vén de recibir o Premio á Mellor Tese de Doutoramento en Ciencia do Solo que outorga a Sociedade Española da Ciencia do Solo.
A tese aborda a partir de técnicas actuais "un dos problemas da física de solos moderna, atopar ligazóns entre as propiedades físicas da rede porosa do solo e a capacidade deste para actuar como filtro".
O xurado destaca que "aborda un campo de elevada complexidade", emprega "técnicas novidosas e de alta calidade que permiten comprender diferenzas asociadas ao manexo agrícola moitas veces postas de relevo, pero poucas veces evidenciadas como neste traballo" e que ten un gran número de aplicacións.
Soto compartiu a súa satisfacción. "Estou moi contento de recibilo" e asegurou que o galardón "anima a seguir investigando neste campo".
"Temos un equipo de investigación bastante potente", afirmou a respecto dos seus compañeiros e compañeiras na universidade, José Eugenio López e Marcos Paradelo, aos que agradeceu o seu apoio.
"O ambiente de traballo é moi bo, e todo iso axuda", agregou o investigador do Departamento de Bioloxía Vexetal e Ciencias do Solo da Universidade de Vigo.
