Hugo GZ

Hugo Guezeta (Ponteareas, 1991) prepara a saída do seu próximo disco coa publicación de sinxelos como "O noso tempo" ou "Feridas". Neste caso o traballo conta coas súas letras e composicións e as bases instrumentais e a produción musical corren por conta de Peter Petrowski. As primeiras datas de presentación do traballo están marcadas para o mes de decembro deste ano.

"Un proceso de liberación". Así define Hugo Guezeta a estrea do seu novo sinxelo, "O Noso Tempo".

Hugo GZ, compoñente do grupo de rap SonDaRúa xunto a That Bass Dj e Alex Arnoso, vén de publicar seis pezas en solitario. Entre o persoal e o íntimo, achegan elementos que este músico galego elaborou durante os días de confinamento, en 2020. O traballo leva por nome 1991, igual que un dos temas, reivindicando o ano en que naceu. Esta experiencia non implica deixar de lado os seus compañeiros, cos que xa ten datas confirmadas para directos no calendario deste 2022.