O candidato do BNG á Alcaldía de Ourense, Luís Seara, e o deputado do BNG no Congreso, Néstor Rego, acudirán esta cuarta feira á sede da Fiscalía Xeral do Estado para entregar un escrito sobre os audios difundidos por La Región que teñen como protagonista o alcalde ourensán, Gonzalo Pérez Xácome. Entre outras cuestións, nos devanditos audios, o rexedor e líder de Democracia Ourensá mantén conversas con persoas da súa confianza nas cales fala de financiar a campaña con 'diñeiro B' e de como "branquealo", ou dunha suposta estratexia para conseguir diñeiro de empresas interesadas en servizos e obras municipais.
O alcalde de Ourense admite nunhas gravacións xestionar “diñeiro en B” para financiar a súa campaña electoral.
O portavoz do PSdeG no pleno da Deputación de Ourense, Ignacio Gómez, recoñeceu que a vía política pola multa ao presidente provincial, Manuel Baltar, está “esgotada” unha vez que os seus “xefes” o avalan e non o instan a dimitir, pero advertiu de que os socialistas “non van parar aquí” e avanzou que o “intentarán” na vía xudicial. Gómez incidiu en que se trata dunha cuestión “suficientemente grave” que non é un feito illado, polo que agora estudarán a vía xudicial máis apropiada.
O presidente da Deputación de Ourense, o popular Manuel Baltar, foi incapaz de xustificar o motivo da súa visita a Madrid en coche oficial.
O Bloque pedirá un pleno extraordinario da entidade provincial no caso de que o presidente non responda ou "profunde aínda máis na crise de credibilidade".
