A revolución verde: o vínculo entre veganismo e ecoloxismo

O termo veganismo foi acuñado en 1944 polos activistas británicos Donald Watson e Elsie Shrigley, fundadores da organización benéfica The Vegan Society. Co tempo, a definición de veganismo foi evolucionando. Na actualidade, esta denominación designa o "modo de vida" que trata de excluír, dentro do posíbel, todas as formas de explotación cara aos animais para a alimentación, a vestimenta ou calquera outro fin. En dietética, refírese á práctica de prescindir de todos os produtos derivados de animais. Detrás do veganismo subxacen fortes conviccións éticas relacionadas coa protección dos animais e da natureza. Este movemento denuncia o impacto negativo que provocan no planeta sectores produtivos como a gandaría intensiva. Nas últimas décadas, un dos principais focos de denuncia do veganismo foi a proliferación de macrogranxas, instalacións de grandes dimensións nas que se crían reses en condicións de amoreamento e insalubridade. Neste sentido, a xornalista Sara Martínez, especializada en medio ambiente, sinala que a relación entre veganismo e ecoloxismo é practicamente indisolúbel, pois "a maior parte das persoas que deciden practicar unha dieta vegana é por motivos medioambientais". Sara é, ademais de xornalista, voluntaria en Greenpeace. Está familiarizada co uso de cosméticos cruelty free (libres de crueldade), produtos que non foron probados en animais durante a súa elaboración. A adquisición deste tipo de artigos é frecuente por parte das persoas veganas ou de individuos sensibilizados co coidado dos animais. A pesar de que a Unión Europea prohibiu expresamente a proba en animais de produtos cosméticos en 2009, Sara denuncia que existen empresas que non acatan a normativa: "Continúan distribuíndose a través de plataformas de venda online", afirma. Á hora de mercar produtos cruelty free, a certificación PETA acredita todos os artigos que non foron probados en animais. O DEBATE | Deben ofrecer os centros de ensino públicos galegos a opción de menú vegano? Alimentación saudábel Nas últimas décadas, o veganismo avanzou de maneira notábel na nosa sociedade como expresión dunha maior concienciación coa preservación do medio ambiente. Neste contexto, resulta imprescindíbel que as persoas que decidan comezar a practicar o veganismo dispoñan de toda a información necesaria. En conversa con Xeración Alfa, a técnica superior en dietética Sandra Román asegura que a dieta vegana é saudábel. "Existen dietas veganas que son saudábeis e outras baseadas en produtos ultraprocesados que non o son", puntualiza. En termos nutricionais, un dos aspectos máis importantes aos que se lles debe prestar atención nunha dieta vegana é a inxesta de vitamina B12. Segundo a opinión experta de Sandra, o suplemento desta vitamina é obrigatorio. Ao mesmo tempo subliña que na transición cara a unha dieta vegana "a principal diferenza é substituír a proteína animal por proteína vexetal". Estes nutrientes adoitan ser deficientes nalgún aminoácido. A soia, en cambio, é completa, por iso é un alimento moi recorrente neste tipo de dietas xunto con derivados como o tofu. Á hora de mercar produtos veganos, Sandra reivindica o produto nacional, "na Galiza temos uns mercados marabillosos". Ademais das grandes plataformas de distribución, existen alternativas como grupos de consumo ou cooperativas. En relación co consumo de produtos de calidade, a técnica superior de dietética denuncia que a sociedade está evolucionando cara á chamada "dieta de cafetaría", baseada no consumo de alimentos ultraprocesados. Fóra do estigma: visibilizar e falar de saúde mental fronte aos tabús e aos prexuízos Soberanía alimentaria Na Galiza, a oferta gastronómica é inconmensurábel. A gran diversidade de produtos de horta que existe permite satisfacer as necesidades de practicamente calquera tipo de dieta, tamén das persoas veganas. Co obxectivo de ofrecer un servizo de calidade destinado a toda a comunidade vegana, hai xa 11 anos nacía Entre Pedras en Santiago de Compostela, un restaurante de comida deste tipo. Lucía Eira, unha das dúas socias da cooperativa do restaurante, lembra como cambiou a sociedade desde entón: "Agora o termo veganismo é moi coñecido, pero alá polo 2013 non o era". Lucía comezou a ser vegana con 22 anos por motivos éticos. Agora, con 38, rexenta un negocio de éxito que non só frecuentan persoas veganas, senón tamén persoas omnívoras: "Creo que temos máis clientes non veganos que veganos, e iso é todo un logro, eliminar o prexuízo de que pasamos fame", salienta. Receita vegana de hummus de cabaza O primeiro paso é cortar a cabaza para poder baleirar o interior do froito. A continuación, débense apartar 300 gramos de carne de cabaza, que logo se colocarán nunha bandexa de forno xunto con dous dentes de allo pelados. O seguinte paso é pulverizar o conxunto con AOVE (aceite de oliva virxe extra). Unha vez realizado este proceso, a bandexa vai para o forno (quentado previamente a 200 graos) para que ase durante 20 minutos. Cando estean a punto, retíranse a cabaza e os dentes de allo asados e mestúranse nun vaso de batedor con dúas culleradas de tahini, 400 gramos de garavanzos cocidos, 100 gramos de iogur natural, zume de limón e un chisco de sal. Finalmente sazonamos e trituramos até obter un puré homoxéneo.