O Rally de Ferrol recupera tramos históricos e ofrece "unha edición espectacular"

A afección do automobilismo galego reencontrarase esta fin de semana coa proba sobre asfalto decana do país: o Rally de Ferrol. Desde 1970, de maneira ininterrompida, o evento reúne o mellor da pilotaxe nacional e internacional por estas datas. Este ano chega á 55º edición con 126 equipos inscritos, un récord para este evento deportivo, e algunhas novidades. O Rally ten programada a chegada dos vehículos e a realización da cerimonia de saída esta sexta feira mesmo, mais a proba comezará no recinto feiral de Punta Arnela (Fimo) o sábado desde as 8.30 horas, o mesmo escenario no que se entregarán os trofeos ás 22 horas. Como en anos anteriores, a competición pasará por concellos de Ferrolterra como Ferrol, Narón, San Sadurniño e As Somozas así como Irixoa (As Mariñas) e Monfero (Eume). Édgar Vigo e Fátima Ameneiro, a consolidar o seu liderado no European Rally Trophy Pilotos e coches atoparanse cos primeiros tramos de Irixoa-Monfero e Monfero-Monfero, con case 14 quilómetros o primeiro deles e algo máis de catorce o segundo, realizando unha segunda pasada polo tramo por Irixoa-Monfero. Despois virá o tramo de Ferrol, localizado na zona de Mandía, para dar paso á especial de San Sadurniño-As Somozas, este de 15 quilómetros, e o tramo das Somozas, neste caso con 10 quilómetros. Ao remate decorrerán as segundas pasadas para sumar 359 quilómetros en total, dos que 112 son cronometrados. Novidades desta edición O presidente da Escudaría Ferrol, Germán Castrillón, explica a Nós Diario que desta vez decidiron centrar a competición nunha soa etapa, o sábado, e recuperar o tramo Ferrol-Ferrol. “Será practicamente novo, epectacular, con zonas coñecidas e outras non”, asegura. Narón recibe a única proba galega do Estatal de Asfalto Ademais, tras confirmar a gran participación que teñen, decidiron “readaptar o horario, sobre todo pola tarde”. A razón é facilitar que no reagrupamento previo ao desprazamento cara a Ferrol os equipos teñan máis tempo. “É un Rally exixente e, desta maneira, as asistencias terán máis minutos para actuar e preparase”, interpreta Castrillón. Senra, favorito Nesta edición volven ser favoritos Víctor Senra e José Murado (Citroën C3 WRC), mais atoparán rivais fortes como Daniel Berdomás e Bras Mirón (Skoda Fabia R5); Alberto Meira e Avelino Martínez (Skoda Fabia Rally2); Jorge Pérez e Miriam Beira (Hyundai i20 R5) ou Alberto Nimo e Mónica Álvarez (Peugeot 208 T16 R5). No Rally tamén haberá participación catalá, coa presenza confirmada de Joan Vinyes e Jordi Mercador (Hyundai i20 N Rally 2), ademais de Gil Menbrado e Alejandro López (Ford Festa Rally 2). Na proba correrán, ademais, as pilotas Ruth Ortega (Peugeot 208 N3) e Vanessa Guisande (Peugeot 106), que terán de copilotos Eduardo Rodríguez e Uxía Carballo, respectivamente. A Subida a Taboada abre o Galego de Montaña Rally histórico O presidente da escudaría organizadora segue a ser na actualidade o piloto que máis probas deste rally gañou ao longo da súa historia, dez en total entre os anos 1987 e 2003, polo que coñece ben a súa evolución. “Tivo que adaptarse aos tempos e aos cambios que viviu durante todo este período o automobilismo”, admite a Nós Diario. O “secreto” da súa continuidade entende que está “no seu propio inicio, cando se fundou a escudaría, sempre con xente moi implicada que tivo moitos apoios para que seguirá adiante”. Desde a Federación Galega de Automobilismo (FGA), o seu presidente, Antonio Rodríguez, considera este rally como “unha das probas de referencia” no panorama do país. En declaracións a Nós Diario recoñece “a importancia desta proba na comarca, non só a nivel deportivo, tamén como dinamizador turístico e económico", polo que promete "pór todo da nosa parte para contribuír a que esta 55 edición do Rally de Ferrol sexa un éxito organizativo e deportivo, especialmente en materia de seguridade”. O responsábel federativo relata que cando solicitaron retornar ao Campionato Xunta da Galiza ao rematar o seu ciclo estatal “abrímoslles as portas da que é a súa casa, conscientes de que achegarían a súa experiencia e saber facer en materia organizativa nun certame tremendamente emocionante e de enorme nivel”. O XXXVI Rally de Narón terá lugar entre o 24 e o 25 de maio Sobre a posibilidade de que o Rally de Ferrol volva entrar como proba puntuábel na competición estatal, Germán Castrillón recoñece as dificultades económicas que iso implica. "Tivemos dúas etapas nas que formamos parte do Campionato de España, nos 80 e entrado o século XXI", lembra, "e daquela había un patrocinador forte que polas súas circunstancias decidiu deixar de apoiar competicións como a nosa", agrega. Con todo, o ex corredor confesa que desde a escudaría "estamos a buscar outro importante, ademais dos que temos agora". Máis alá das cuestións económicas, Germán Castrillón non agocha que "a dirección da Federación Española de Automobilismo debería ser máis coherente e razoábel como para premiar as carreiras que son como teñen que ser". Neste sentido, entende que "con Ferrol a realidade foi un pouco distinta".