Empresas galegas facturaron máis de 234 millóns en exportacións coa China

A decisión da Comisión Europea de elevar a 38% os aranceis aos vehículos eléctricos da China o vindeiro 4 de xullo por “competencia desleal”, secundando as políticas e sancións económicas aplicadas polos Estados Unidos, provocan na Galiza preocupación pola previsíbel guerra comercial da Unión Europea coa China, que podería pór en perigo na Galiza intereses económicos. Esta mesma segunda feira, o Ministerio de Comercio chinés anunciou que comeza unha investigación sobre a carne de porco importada desde UE por "exceso de capacidade" e subvencións masivas, basicamente a mesma linguaxe que empregou a UE para impor aranceis aos coches eléctricos. Segundo os últimos datos do Instituto Galego de Promoción Económica (Igape), dependente da Consellaría de Economía e Industria, a China converteuse nos últimos anos no primeiro destino de Asia das exportacións galegas. O ano pasado esta cifra alcanzou os 234 millóns de euros (foron 223 millóns en 2022). Os datos da Xunta destacan que desde o ano 2020 as exportacións galegas coa China aumentaron en 25%. A UE únese á guerra comercial dos Estados Unidos coa suba de aranceis aos coches eléctricos da China As cifras da Consellaría de Economía reflicten que o comercio exterior da Galiza coa República Popular China en 2023 sumou 243 millóns de euros en exportacións, 2.591 millóns en importacións, co que o saldo comercial favorece á China en 2.357 millóns de euros. O número de empresas galegas que manteñen co xigante asiático relacións de comercio exterior é de 291. Da factura de exportacións galegas á China en 2023, perto de 72% (168 millóns de euros) foron vendas do sector primario galego ao mercado chinés. A factura máis elevada correspondeu ao sector pesqueiro, cunha cifra total de exportacións de 87 millóns de euros, fundamentalmente en peixe conxelado (65,4 millóns de euros) e moluscos (19,7 millóns), segundo os datos do Ministerio español de Industria. A seguir en importancia das exportacións galegas na China está outra pata fundamental do sector primario galego, os lácteos. Este sector vendeu en 2023 á China por valor de 74,84 millóns de euros. Desta cifra total, 40,64 millóns foron en vendas de leite e nata e outros 28,85 millóns en lactosoro, tamén 5 millóns de euros en exportacións de queixo e requeixo. O sector cárnico galego en 2023 sumou vendas por importe de 5,59 millóns de euros (4,6 millóns de “despoxos comestíbeis de animais”). O sector porcino galego está nos últimos anos a elevar o seu negocio coa China. González Palau: "A UE escribiría un guión de seu mudando de lealdades" O profesor de Economía Aplicada da Universidade de Santiago de Compostela Gonzalo Rodríguez sinala a Nós Diario que “haberá represalias da China” en caso da suba de aranceis da UE, e coas previsíbeis denuncias na Organización Mundial do Comercio “pode pasar un ano” mentres se soluciona a situación, algo que “nas exportacións galegas de porco pode supor que as empresas perdan un ano de negocio”. O presidente da Confederación de Empresarios da Galiza (CEG), Juan Manuel Vieites, valora para Nós Diario a situación. Explica que a guerra comercial “pode ter varias implicacións significativas”, como a “redución do comercio”, xa que segundo Vieites o aumento de aranceis “pode facer que os produtos importados/exportados sexan máis caros, reducindo a competitividade no mercado internacional e diminuíndo o volume total de comercio”. A CEG advirte dun posíbel “impacto en empresas galegas”, concretamente as que dependen de insumos ou produtos chineses. “Enfrontarán maiores custos, o que podería traducirse en prezos máis altos para os consumidores e unha redución nas marxes de ganancia. Isto podería levar a unha diminución da rendibilidade” e mesmo “a peches de negocios”. Preocupa na CEG que “a China podería impor aranceis como represalia a produtos galegos, afectando negativamente os exportadores e reducindo as oportunidades de mercado”. Sinalan que “un aumento dos aranceis podería significar millóns de euros en custos adicionais para as empresas galegas, afectando negativamente a economía rexional”. A Xunta ve "unha oportunidade" Pola contra, a ameaza dunha guerra comercial coa China para a Consellaría de Economía “pode facilitar o desenvolvemento industrial do noso sector da automoción e da súa cadea de valor na medida en que se implanten novas industrias en territorio e que tamén se compre a empresas de aquí”. Desde o Goberno galego aseguran a Nós Diario que “levamos tempo solicitando ao Estado que teña en conta toda a cadea de valor local ligada á automoción”. A Xunta centra a súa análise en que “existe unha preocupación real de que as grandes matrices contraten os compoñentes na China e outras economías emerxentes”. A Consellaría ve que a medida da UE “pode favorecer o que desde o Goberno galego levamos tempo pedindo”. Haberá que ver como se articula regulamentariamente porque, “cómpre ter en conta a importación doutros compoñentes”. Isto é “esencial”, din, porque “dos case 25.000 empregos vinculados á industria galega da automoción, 18.000 son vinculados á industria de compoñentes”. Rueda pedía hai 2 meses “reforzar” relacións As relacións comerciais e económicas da Galiza coa China teñen sido nos últimos tempos obxecto dun interese especial por parte da Xunta. De feito, o pasado 16 de maio o propio presidente da Xunta, Alfonso Rueda, mantiña na Coruña un encontro co embaixador da República Popular China en España, Yao Jing, no que segundo informou o Goberno galego avaliaron diferentes medidas para reforzar as relacións económicas entre a Galiza e o país asiático. Na reunión falaron de posibilidades de novas oportunidades de negocio para as empresas galegas na China e da atracción de investimentos na Galiza, onde xa o país asiático conta con compañías na metalurxia e a conserva, entre outras. Pneumáticos chineses Na China ten tamén o Igape unha antena comercial para traballar o fluxo dese mercado en ambas as direccións. E mesmo en xullo pasado o Igape visitou a Cámara de Comercio e Industria do país asiático para renovar un convenio de 2018. Este ente chinés aglutina 10.000 empresas. Desde o Igape falan do “interese mutuo”. De feito o Consello da Xunta declarou en 2022 Proxecto Industrial Estratéxico unha planta de neumáticos da empresa chinesa Sentury Tire para As Pontes, cun investimento de 531 millóns, 700 empregos e unha produción anual de 12 millóns de pneumáticos.