Galiza, á cola do Estado en crecemento de negocio industrial: "Non podemos permitirnos quedar atrás"

A cifra de negocios da industria baixou na Galiza de media, no que vai de ano, 2,2% o pasado abril e deixa a súa taxa anual en 8,2%, lonxe da media do conxunto do Estado español que foi de seis puntos máis, 14,2%, ao contar cun aumento de 0,5% no que vai de ano. Son os datos que difundiu esta sexta feira o Instituto Nacional de Estatística (INE), que confirman que a cifra galega é a terceira con peores resultados tras Asturias (6,1%) e Cantabria (2,7%). Pola contra, os territorios con mellores cifras foron Illes Balears (28,6% anual e 10% no que vai de ano) e Madrid (24% e 2,3% desde o mes de xaneiro). Non habendo datos desagregados para o caso galego, o índice do cuarto mes de 2024 tivo en conta o resultado a nivel estatal das subas interanuais das vendas rexistradas nos bens de equipo (+20,1%), bens de consumo non duradeiros (+17,5%), bens de consumo duradeiros (+17%), bens intermedios (+9,2%) e enerxía (+7,7%). Por ramas, tamén a nivel estatal, o maior aumento das vendas en abril, no que atinxe á taxa interanual, foron a construción naval (+68,5%), a fabricación de produtos de xoiería, bixutería e de instrumentos musicais (+37,4%) e a fabricación de artigos de limpeza e para dar brillantez (+22,1%). O único descenso da facturación anotouno a fabricación de produtos relacionados co procesado feito en muíños, amidóns e alimentación animal, que tivo unha caída de 5,8%. Que fai caer a produción industrial na Galiza? Crecemento lento Para o profesor de Historia Económica da USC, Adrián Dios, a información que facilitou esta sexta o INE sinala, como aspecto positivo, a propia dinámica de crecemento industrial. "Vexo que as empresas galegas son capaces de ter máis ingresos pola súa actividade", sinala a Nós Diario. No entanto, o dato negativo chega ao realizar a comparación dos datos co resto do Estado español. "A Galiza medra máis lenta e as cifras apuntan a que estamos nunha mala posición, en principio a terceira comunidade autónoma que menos medra", explica o investigador. Non só iso, Adrián Dios evidencia, coa cifra acumulada desde 2021, "que estariamos na segunda posición pola cola, só por diante da Rioxa". Na súa opinión, "aínda que se vai na boa dirección, imos máis despacio que o conxunto do Estado", algo que no panorama actual de "crecente reindustrialización que hai en Europa", entende que "a Galiza non pode permitirse quedar atrás". Dios resume a análise sinalando que "as empresas galegas son capaces de vender máis, pero de maneira lenta en relación coa súa contorna próxima". Tendencia á alza estatal Analizando os datos por sectores industriais, Fernando de la Torre, economista e investigador da Universidade de Santiago de Compostela, considera, en declaracións a Nós Diario, que “a tendencia á alza xeral no Estado español xa viña da post crise financeira e confírmase despois da crise da Covid-19”. Porén, alerta de que hai que ter en conta que as estatísticas de cifras de negocios por computar “datos que están a prezos correntes e seguramente o volume de negocio estea influenciado até certo punto pola inflación”. Industria e investimento centran o almorzo do Foro Económico da Galiza con Ana Pontón Neste sentido, lembra que “os custos soben e a cifra de negocio diminúe, mais tamén o prezo percibido polas empresas industriais que venden tamén aumentou”. Esas diferenzas, para De la Torre, “poden deformar un pouco a imaxe final”. Con todo, cre que “hai unha expansión do sector industrial no Estado español, algo coherente despois de deixar de depender da construción para depender do turismo, a partir dunha certa orientación exportadora industrial”. En relación aos datos, este investigador observa que hai "un crecemento maior na cifra de negocios daquelas industrias de bens de consumo e menor nas que están orientadas a bens intermedios", algo que semella indicar "unha especialización produtiva industrial estatal que está dirixida cara á transformación de alimentos do agro ou do automóbil, entendido como ben de consumo, e non tanto cara a outros como maquinaria ou equipo". Sector servizos O INE tamén deu esta sexta feira a coñecer a facturación do sector servizos, que na Galiza sobe 8,6% se se compara co mesmo mes de 2023 Esta cifra é similar ao incremento contabilizado a nivel estatal, que foi ese mesmo mes de 8,8%. No que vai de ano, de media galega sumou 1,8% a facturación, mentres que no conxunto do Estado foi de 2,6%. En relación á ocupación, o sector creceu 2,3% no cuarto mes deste exercicio e 1,9% no que vai de 2024. A nivel estatal, pola contra, a taxa foi 14,7 puntos superior á do mes anterior, a súa maior alza desde marzo de 2023. Dentro do sector servizos, na Galiza, o comercio tivo un crecemento que rematou en 9,9% e outros servizos 5,1%. A nivel estatal, o aumento foi de 9% no primeiro e 8,6% no segundo. Nas actividades comerciais, o comercio por xunto rexistra un incremento de 8,2% (8% a nivel estatal), co que achega 4,3 puntos a taxa de variación do índice xeral e a venda e reparación de vehículos a motor crece 42,8% (25,2% a nivel estatal). Teñen futuro as empresas galegas? No que atinxe a outros servizos, na Galiza rexistraron crecementos o transporte (4,3%), a información e a comunicación (21,7%), ademais de actividades profesionais, científicas e técnicas (13,4%). A hostalaría, pola súa parte, rexistra en abril a maior caída da facturación cdo mes, con -9,5%. A nivel estatal, este apartado, pola contra, medra 8,6%, salientando as actividades administrativas e servizos auxiliares que aumenta 13,2%. En relación ao persoal ocupado (que inclúe tamén o persoal remunerado, sen remuneración fixa e as traballadoras e traballadores autónomos dependentes) neste sector aumenta 2,3% na Galiza (2% no Estado). Por actividade, maior incremento prodúcese na hostalaría (4,2%). Pola contra no conxunto do Estado español o maior crecemento ten lugar nas actividades administrativas e servizos auxiliares (2,9%). Naval e armamento duplican cifras Entre os datos que facilitou esta sexta feira o INE en relación á cifra de negocios da industria, un dos apartados que resalta o economista galego Fernando de la Torre a Nós Diario é o que está relacionado coa actividade industrial relacionada coa construción naval, ferroviaria, aeronáutica, espacial e de vehículos de combate, que aumentou en abril no índice interanual 68,5% e, desde o inicio de ano, 25,9% . "Se temos en conta os datos que se deron a coñecer desde 2021 e até 2024 vemos que a que maior viu incrementada a súa cifra de negocios foi a que está relacionada coa industria militar", constata. Neste sentido apunta que esta actividade conta "cun índice sempre por riba de 200%, o que significa que duplicou a súa cifra de negocios para estar nun destacado primeiro lugar".