Mariscadoras exixen á Xunta controlar as verteduras e sanear as rías: "A situación é crítica"

A Plataforma en Defensa da ría de Arousa (PDRA) reuniu esta segunda feira diante da delegación da Consellaría do Mar en Ribeira (O Barbanza) representantes dos diferentes colectivos que a compoñen para entregar un escrito reclamando "que non deixe abandonadas as rías galegas" e que "aborde e dea solucións aos problemas" do sector do marisqueo “porque entendemos que segue a ser súa obriga competencial”. Esta concentración fecha, polo momento segundo fontes da PDRA, a cadea de accións que xa pasaron polas sedes administrativas da Xunta da Galiza o pasado 18 de abril na parroquia vilagarciá de Carril (O Salnés) e tamén o 30 de abril polo barrio pontevedrés de Campolongo. Faise nunha ría que, segundo datos do Instituto Galego de Estatística (IGE) publicados en 2023, contaba en 2020 con 1.603 mariscadoras e mariscadores en activo, que representaban 44,3% do persoal que se dedica a este oficio na Galiza. Medidas estruturais e socioeconómicas O presidente da PDRA, Xaquín Rubido, asegura a Nós Diario que a demanda do sector, en relación coas medidas estruturais, “é a mesma en todas estas rías: o seu saneamento integral, un plan de rexeneración dos bancos marisqueiros, medidas efectivas para controlar as verteduras e maiores exixencias legais en relación a esta verteduras”. Rubido lembra que a realidade que teñen agora sinala “unha menor renovación das augas polo que o efecto da contaminación é maior”. Pola situación actual “de emerxencia”, desde a PDRA entenden que deberían coordinarse as Administracións galega e estatal, mais tamén “debería intervir a Unión Europea”, apunta Rubido. O marisqueo a pé da ría de Pontevedra tamén pide axuda Os colectivos tamén reclaman medidas socioeconómicas, neste caso á Consellaría do Mar e ao Goberno español. “Urxe a exención do pago da Seguridade Social ás mariscadoras mentres dure esta situación para que poidan afrontar os traballos necesarios de rexeneración dos bancos marisqueiros”, explica Rubido. En relación á Xunta, a demanda é de que “pague até o salario mínimo interprofesional para garantir a estabilidade das mariscadoras e dos mariscadores”. Caciquismo e privatización A PDRA solicitou un encontro ás Administracións galega e estatal “sen ningún tipo de restricións” para tratar “de maneira urxente” a situación do sector. Rubido rexeita a actitude do conselleiro do Mar, Alfonso Vilares, “que está mantendo xuntanzas individuais coas diferentes confrarías para ofrecerlles saídas distintas e comprar a vontade da xente”. Neste sentido, informa de que os patróns maiores de toda a ría de Arousa solicitaron unha reunión conxunta co conselleiro. Alén disto, denuncia que nesta "situación crítica" é preciso "un estudo independente" e non deixar pasar o tempo. Rubido alerta de que "hai intereses do gran capital por privatizar o mar aproveitando a debilidade do sector marisqueiro". 95% menos de ameixa A poucos quilómetros de onde tivo lugar a concentración, no núcleo boirense de Cabo de Cruz, o patrón maior da súa confraría, Jesús Pérez, explica a Nós Diario ao remate da protesta que “cada vez hai menos marisco e menos xente que se dedique a mariscar”. Relata que, no que respecta ao sector de a flote, especies como a ameixa babosa “está case desaparecida, cunha produción que baixou 95%”, un caso semellante ao da vermella e ao carneiro. Para ter unha imaxe máis clara da situación sinala que tres anos atrás o habitual era vender “entre 500 e 600 quilos cada día na lonxa e agora a media é de quince quilos”. As primeiras consecuencias desta situación son o abandono do oficio do que viven agora “196 persoas que traballan a pé e 140 a flote”. Porén neste segundo caso, das 82 embarcacións que ten a confraría na actualidade, apunta que “só traballan 10, cun total de 28 tripulantes”. O marisqueo da ría de Arousa pide "un plan de acción" á Xunta Presenza do BNG Na concentración de esta segunda feira participou o alcalde de Ribeira, o nacionalista Luís Pérez Barral, e o segundo tenente de alcalde Francisco Suárez-Puerta Colomer (PSdeG). O alcalde de Ribeira, en declaracións a Nós Diario, explicou a súa participación na mobilización para denunciar, entre outras cousas, "a baixada na produción, a falta de axudas ou a inacción do Goberno galego para atallar os problemas que ten o sector", e por ser este para o municipio que preside "fundamental o sector do mar". Lembra que "na economía ribeirense" este ramo ten 32% do produto interior bruto (PIB). Así, Pérez reclamou esta segunda feira un "Plan estratéxico de recuperación das rías", a creación dun "seguro público de produción marisqueira que supla as perdas" e un protocolo de desaugamento dos encoros, entre outras medidas. Asistiron á mobilización tamén a deputada do BNG no Parlamento galego Rosana Pérez e a eurodeputada Ana Miranda. A ría de Pontevedra está sen marisco desde decembro En circunstancias semellantes ás que teñen na ría de Arousa están as mariscadoras da ría de Pontevedra. Até a concentración de Ribeira desprazouse esta segunda feira un autobús e varios coches particulares para protestar polo que consideran “abandono" que padecen. Entre as asistentes estivo a presidenta da mariscadoras a pé, Raquel Gómez, que lembra a Nós Diario “a mortalidade que tivemos nos meses de novembro e decembro”, unha circunstancia que afectou as 300 persoas que traballaban nese momento. “Estamos cun cese de actividade e sementando”, asegura, “o problema é que cando voltemos en xullo pensamos que non haberá e non poderemos cobrar un salario digno”, engade. Máis control Esta mariscadora de Poio (comarca de Pontevedra) cre que nestas rías, nos últimos anos, "non hai un control de verteduras" e como consecuencia o marisco "non aguanta máis a presión que ten durante tanto tempo". Alerta de que agora as rías "son vertedoiros, todo vai parar a elas e non se lle dá o valor que se lle daba antes", engade. Por este motivo exixe un control máis estrito por parte da Xunta da Galiza "para que non acontezan situacións como a que estamos vivindo estes meses".