O Parlamento do Estado de Israel aprobou esta cuarta feira (4 de agosto) unha lei pola que autoriza o encarceramento de menores de 14 anos acusados de "terrorismo". A medida, proposta polo partido que apoia o goberno, Likud, fai parte dun conxunto de reformas legais levadas a cabo polo Estado de Israel nos últimos anos e entre as que se atopa a posibilidade de condenar unha persoa a 20 anos de prisión por tirar pedras contra as Forzas Armadas israelís.
Para aqueles asasinados cun coitelo no corazón non importa se o menor ten 12 ou 15 anos", dixo a deputada do Likud, Anat Berko
Segundo a deputada do Likud e defensora da proposta, Anat Berko, o obxectivo da denominada 'Lei de xuventude' é punir "a onda de terrorismo" que, asegura, atinxe o Estado de Israel "desde hai algún tempo". "A sociedade está autorizada a protexerse. Para aqueles asasinados cun coitelo no corazón", sinalou referíndose á que se considera a cuarta Intifada, a dos coitelos, "non importa se o menor ten 12 ou 15 anos", recolle EFE.
A reforma contou co apoio de 32 parlamentares, 16 votaron en contra e apenas un deputado se abstivo. Porén, nas cadeas israelís a cifra de crianzas detidas, entre 12 e 17 anos, ascendía a finais de 2015 a 422 segundo os dados fornecidos por UNICEF.
En 2015 UNICEF cifrou en 422 as crianzas detidas en cadeas israelís
![Publicidade 202089]()
De acordo coa información proporcionada polo órgao dependente das Nacións Unidas este supón o número máis elevado dos últimos sete anos, o que evidencia que a detención de crianzas non é algo novo nen comezará a implementarse após a reforma lexislativa. De facto, entre 1967 e 2013 Israel detivo máis de 25 mil, segundo a Asociación de Axuda a Prisioneiros Palestinos Al-Asi, unha información que publicaba Sermos Galiza na altura, facéndose eco tamén das denuncias de torturas, vexacións e mesmo abusos sociais ás que eras sometidas as crianzas nas prisións.
No concreto, a Organización en defensa das crianzas internacional-palestina (DCIP) en declaracións recollidas pola axencia de noticias local Maan situaba no 86% a cifra de menores en Palestina que expirementaron algunha forma de violencia física durante a súa detención ou interrogatorio.
Aliás, algunhas familias teñen denunciado que no interior das prisións as crianzas son obrigadas a traballar por 4 dólares ao día, como recolle o portal de información Middle Est a respeito dun caso na cadea de Ofek.
