Xa son máis de 36.200 as vítimas mortais que deixou, desde o pasado 7 de outubro, a inédita e cruenta ofensiva de Israel sobre Gaza. Segundo fontes do Ministerio de Saúde da Faixa, nas últimas 24 horas foron asasinadas outras 53 persoas, elevando o cómputo global a 36.224, alén de até 81.777 feridas de diversa consideración desde o inicio do conflito. Ademais, outras 10.000 palestinas e palestinos fican en paradoiro descoñecido, polo que se teme que a cifra de falecidos sexa moito maior.
Israel gábase de atacar na última xornada "máis de 50 obxectivos" supostamente vinculados a Hamás, se ben un dos albos foi unha ambulancia da Media Lúa Vermella, tal e como recoñeceu o propio Exército. Un tanque abriu fogo esta pasada noite por percibilo como un "vehículo sospeitoso" e acabou coa vida de dous paramédicos, Haitham Tubasi e Suhail Hassouna, que viaxaban no seu interior.
🚨The bodies of #PRCS paramedics Haitham Tubasi and Suhail Hassouna have arrived at Nasser Hospital in Khan Yunis, following the occupation’s bombing of the ambulance they were in while performing their humanitarian duties last night in the Tel Sultan area west of #Rafah.… pic.twitter.com/WoDHblnqHy
— PRCS (@PalestineRCS) May 30, 2024
A oenegué acusou Israel de perpetrar un ataque "deliberado", pois a ambulancia estaba debidamente identificada co distintivo da Media Lúa. Nos últimos meses foron asasinados 19 dos seus traballadores, así como varias decenas máis doutras organizacións humanitarias que están a prestar apoio aos milleiros de persoas que tentan refuxiarse dos bombardeos dentro da ratoeira na que se converteu primeiro o norte da Faixa e agora a cidade fronteiriza de Rafah, que Israel porfía en tomar pola forza.
Ataque en Damasco
Por outra parte, as autoridades iranianas aseguraron esta quinta feira que o Goberno de Benjamin Netanyahu utilizou o bombardeo sobre o Consulado de Irán en Damasco (Siria) como 'moeda de cambio': se o país persa renunciaba a responder ao ataque contra o seu propio persoal diplomático, Israel comprometíase a "alcanzar un acordo na guerra" de Gaza. Porén, sinalou o comandante Amirali Hayizadé, a operación foi "un erro de cálculo" israelí, pois Irán si respondeu cun ataque con drons e mísiles.