Geert Wilders, que lidera o ultradereitista Partido pola Liberdade nos Países Baixos, que se converteu en primeira forza nas eleccións de finais de 2023, fixo público esta cuarta feira que tras unha negociación que se estendeu ao longo de meses alcanzou un acordo con tres formacións conservadoras para estabelecer un Executivo de coalición.
Por mor dos vetos do resto de partidos Wilders non será o primeiro ministro, unha posición que se concretará “máis adiante”, así como outros aspectos do pacto, pero incidiu en que a súa formación será a voz principal do Goberno, que contará con maioría absoluta no lexislativo.
Tamén renunciaron a asumir posicións no novo Executivo os liderados do resto de formacións. Un deles, Pieter Omtzigt, de Novo Contrato Social, subliñou que xa “se propuxo un candidato” a primeiro ministro.
O propio Omtzigt estivo a punto de bloquear as conversas en febreiro polas súas dúbidas arredor de que Wilders fose a respectar a Constitución e o Estado de dereito.
As catro formacións teñen que analizar o contido do acordo antes de remitilo ao resto do Parlamento para iniciar un proceso de ratificación que se prevé se alongue varias semanas.
Geert Wilders, líder do Partido pola Liberdade (PVV), de extrema dereita, impúxose nas eleccións parlamentarias anticipadas que decorreron o pasado mes de novembro, ao facerse con 37 dos 150 asentos na Cámara de Representantes, coa coalición progresista entre o Partido do Traballo e a Esquerda Verde, encabezada polo ex vicepresidente da Comisión Europea Frans Timmermans, en segundo lugar con 25 escanos.
