"O compromiso coa paz e co civismo tense que manter nas próximas horas. Só desta maneira poderemos acabar gañando", dixo con solemnidade na coda do seu solemne discurso, un novo apelo desde o soberanismo a que o proceso de autodeterminación se conduza por vías exclusivamente pacifistas, fronte á escalada represiva do Estado.
Ao se coñecer o contido do seu discurso, os miles de estudantes que enchían a Praça de San Jaume comezaron a corear o cántico "In-De-Pen-Den-Cia", a palabra de orde que ten guiado ao longo destes anos o procés de autodeterminación.
Na súa comparecencia, Puigdemont explicou que considerou seriamente a convocatoria de eleccións porque é "o meu deber e a miña responsabilidade esgotar todas as vías para achar unha saída dialogada e pactada" a un conflito que, dixo, é "de natureza política e democrática".
Segundo NacióDigital, Puigdemont resgatará da gaveta a declaración de independencia que se podería votar na quenda de propostas de resolución do pleno do Parlament a sexta feira
"Ninguén poderá dicer que non o tentásemos", dixo. Con efeito, o president tentouno até o final. Ofereceu a Madrid unha cesión considerábel -a convocatoria de eleccións sen previa declaración de DUI, o que de facto esgazaba o bloco soberanista- a pedir en troca a suspensión do 155. Mais non obtivo ningunha garantía de que así fose ser. "Non hai ningunha garantía que xustifique a convocatoria de eleccións ao Parlament", alegou.
Para o president, o PP "engadiu tensión nun momento en que cómpre distensión e diálogo". "A aplicación do 155 está fóra da lei e é inxusta e abusiva", dixo Puigdemont, para quen o que move o Estado neste momento -até o ponto de non recoller a luva das eleccións antecipadas sen DUI- é unha "intención vingativa" pola derrota que sofreron o 1-O, cando, embora a violencia policial, 2,2 millóns de persoas votaron na consulta autodeterminista.
Unha partida en dúas pantallas
A partida deste 26-O librouse en dous campos de xogo. Nun contendían o Govern co Estado. Noutro Puigdemont e a maioría do PDeCAT cos outros actores do soberanismo, quer os políticos -ERC e CUP- quer os colectivos soberanistas. Nun carrusel de emocións Puigdemont foi tildado de traidor en faixas na rúa e en chíos nas redes sociais no momento en que parecía inminente a súa comparencia para anunciar as eleccións anticipadas. As presións sobre o president foron moi intensas. Desde deputados do PDeCAT que anunciaban a súa saída do partido -Jordi Cuminal e Albert Batalla- até unha ERC que amagaba con abandonar o Govern se finalmente Puigdemont consumaba a convocatoria de novos comicios.
Ao dar marcha atrás, e ao entregar a palabra a un Parlament con maioría independentista, Puigdemont rehabilita a súa figura e volta a se colocar ao fronte do procés.
E agora? Segundo NacióDigital, Puigdemont resgatará da gaveta a declaración de independencia que se podería votar na quenda de propostas de resolución do pleno do Parlament a sexta feira.
