Tempos de cambio en Xapón: a retirada de Kishida e a loita pola sucesión

Tras a renuncia do primeiro ministro, efectiva a partir de setembro, dá comezo a carreira pola posición á fronte do goberno nipón entre acusacións de corrupción e inestabilidade económica. Fumio Kishida, primeiro ministro xaponés dende o ano 2021, anunciou hai unha semana que non se volvería postular para os comicios internos do Partido Liberal Democrático (PLD), o que, de xeito inevitable, significa a súa renuncia a continuar no seu cargo dentro do goberno. O PLD é o partido con maior influencia dentro do Parlamento nipón. Cando un novo líder de partido sexa elixido en setembro, esta nova figura substituirá a Kishida dentro do PLD. Porén, grazas á maioría parlamentaria, o novo líder será tamén o novo primeiro ministro de Xapón. Aínda que o sucesor de Kishida está por determinar, existen xa algunhas elucubracións ao respecto, como non podía ser doutra forma. Entre os nomes que máis resoan atópase o de Shinjiro Koizumi, fillo do anterior primeiro ministro Junichiro Koizumi e un dos homes fortes do PLD xa nos tempos de Shinzo Abe. Shigeru Ishiba, actual secretario xeral do PLD e ministro de defensa, é outro dos nomes favoritos. Unha líder feminina Algunhas voces, aínda que leves, apuntan a que se trata dunha grande oportunidade para que Xapón elixa a primeira muller en liderar o seu goberno. As candidatas máis probables dentro do partido dominante serían Sanae Takaichi e Yoko Kamikawa. Ambas ocupan xa cargos de ministra. O propio Kishida expresou o seu desexo de que a persoa que o suceda demostre un espírito de reforma, para liderar un cambio e recuperar a confianza da cidadanía tanto no goberno coma no partido. O PLD leva case sete décadas dominando o parlamento xaponés, polo que non parece moi probable –polo de agora– que a persoa que ocupe o próximo cargo máis elevado do executivo chegue da man doutro partido político. O goberno de Kishida non tivo escaseza de dificultades que afrontar. A resistencia interna do PLD ás reformas de partido, reforzando a posición dos baróns e das políticas conservadoras e pragmáticas, podería favorecer no medio prazo unha perda maior de popularidade entre o electorado xaponés. Kishida expresou o seu desexo de que a persoa que o suceda demostre un espírito de reforma Os escándalos de corrupción dentro do partido son un obstáculo engadido e unha das supostas razóns polas que Kishida optou por abandonar o cargo. Un dos máis soados garda relación coa recente lei de control de fondos monetarios, que obriga a unha maior transparencia no que respecta ás doazóns parlamentarias. A oposición asegura que esta nova lexislación ten menor peso do agardado e que, a efectos prácticos, non ten capacidade para cambiar a situación e remediar a falta de responsabilidade. Tamén a vinculación do PLD coa Igrexa da Unificación, acusada en reiteradas ocasións de tráfico de influencias e outras prácticas cuestionables, pesa sobre a reputación do partido e do Goberno. O asasino do anterior primeiro ministro, Shinzo Abe, pertencía a unha familia vinculada a este novo movemento relixioso. Remontada do ien Contra a continua deflación que Xapón está a experimentar nas últimas décadas, as políticas de Kishida –denominadas "novo capitalismo"–, enfocadas en aumentar os salarios e o investimento, tiveron como obxectivo loitar contra o limitado crecemento económico do país. Este ano, o ien caeu en valor a cifras que non se vían dende a década dos noventa. Isto aumentou os custos de vida para os xaponeses de a pé, xa que as importacións, máis caras pola desvalorización da moeda nacional, elevaron os prezos de bens básicos como a enerxía e os alimentos. Unha lixeira remontada podería apuntar á estabilización, pero é cedo para asegurar nada. Parte do amplo legado de Kishida á fronte do Goberno de Xapón é a proximidade que logrou establecer co presidente surcoreano Yoon Suk-yeol (no cargo dende 2022), rompendo un largo rexistro de asperezas e inimizades entre os seus respectivos países no plano da política internacional. Como ministro de Asuntos Exteriores, Kishida tamén logrou traballar man con man con países moi importantes dentro da rexión (Australia) e organizacións internacionais como a Asociación de Nacións do Sueste de Asia, fomentando a cooperación e o afondamento das estruturas económicas. A data do congreso no que se votará un novo líder para o partido dominante en Xapón anunciarase a derradeira semana de agosto, aínda que se espera que este se celebre entre o 20 e o 24 de setembro. As próximas eleccións xerais terán lugar a finais de 2025.