Despois de que a semana pasada o Partido Popular (PP) presentara un recurso de inconstitucionalidade contra a Lei de amnistía, a segunda feira foron 7 dos 13 Gobernos autonómicos que ostenta -nun máis, en Canarias, forma parte do Executivo liderado por Coalición Canaria- os que rexistraron o recurso no Tribunal Constitucional.
Ademais da Galiza, Andalucía, Aragón, Madrid, Cantabria, País Valencià e Murcia tamén presentou unha apelación Castela-A Mancha, un dos catro Executivos territoriais encabezados polo PSOE. A voceira do Goberno de Emiliano García-Page, Esther Padilla, insistiu en que a norma é “inconstitucional porque rompe o principio de igualdade entre os cidadáns”.
O prazo límite para os recursos á medida de graza a favor das persoas independentistas catalás represaliadas polo Estado expira mañá.
Fontes do órgano xudicial trasladaron a medios estatais que consideran segura a aceptación da constitucionalidade da Lei, adiantando que os recursos serán descartados cos seis votos de maxistradas e maxistrados progresistas contra os cinco dos conservadores.
