Cómpre unha autocrítica

Diciamos 'onte' nos artigos publicados en Nós Diario (12-8-2021 e 17-8-2021) e que titulaba Falta coherencia, coordinación e vontade política para acabar cos restos do franquismo: "Que manteñan eses restos do franquismo é unha irresponsabilidade, un mal exemplo e unha ofensa ás vítimas do franquismo. Cómpre unha autocrítica por parte de todas as forzas políticas e manifestar un compromiso firme para acabar con esta vergoña nun prazo de seis meses, comezando por facer un inventario polas deputacións, gobernadas pola esquerda, dos restos do franquismo nos concellos da provincias da Coruña, Lugo e Pontevedra. Non podemos calar!". Diciamos 'onte' no artigo publicado nestas páxinas (9-6-2023) titulado Non deixemos para mañá o que debemos facer hoxe: "Por unha falta de vontade política ou de tempo (a Lei de Memoria Histórica aprobouse hai 15 anos), acabado o mandato da Deputación de Pontevedra, goberno PSOE-BNG, continúan, entre outras, distincións a falanxistas e gobernadores civís de Pontevedra na ditadura: Rafael Fernández Martínez, Medalla de Ouro; José González-Sama García, Fillo Adoptivo; Ramón Encinas Diéguez, Medalla de Ouro". Diciamos 'onte' no artigo que titulaba Día da Galiza Mártir homenaxea as vítimas, que facemos cos vitimarios? (Nós Diario, 2 1-8-2024): "Os verdugos, os protagonistas da represión criminal, golpistas e cargos públicos do franquismo, seguen aí en case cen concellos de Galiza, tamén nos gobernados pola esquerda, dando nome a rúas e recibindo distincións". Hoxe quero manifestar, como vítima do franquismo, a miña indignación e decepción pola actuación da esquerda en Galiza en relación coa execución, como mínimo, da Lei de Memoria Democrática, para acabar coas honras e distincións a ministros, golpistas, falanxistas, franquistas e represores. Ministros na ditadura Moitos eran militares e participaron no exército sublevado en 1936. Este é un resume porque Santiago de Compostela conserva con distincións 20 ministros na ditadura e Ferrol, nove. —Gonzalo Fernández de la Mora. Fillo Adoptivo de Pontevedra (7-12-1972), alcaldía do BNG; Fillo Adoptivo da provincia da Coruña (19-5-1973), goberno da deputación de PSOE-BNG; Fillo Adoptivo de Ferrol (18-6-1973), alcaldía do PSOE até 2023. Fillo Adoptivo de Poio (2-12-1974), alcaldía do BNG até 2023. —Juan Antonio Suanzes. Fillo Predilecto de Ferrol (2-5-1949); Medalla de Prata de Santiago, alcaldía do PSOE e do BNG desde 2023; Medalla de Ouro de Lugo, goberno PSOE-BNG. —Eduardo González-Gallarza. Falanxista, Fillo Adoptivo de Vigo (12-3-1954), alcaldía do PSOE. —Pedro Nieto Antúnez. Almirante, Fillo Predilecto de Ferrol (3-5-1961). —Pablo Martín Alonso, Capitán Xeral de Cataluña. Fillo Predilecto de Ferrol (4-12-1967); Fillo Adoptivo da provincia da Coruña (5-1-1937). —Salvador Moreno Fernández. Almirante. Fillo Predilecto de Ferrol (2-5-1949); Fillo Predilecto da provincia da Coruña (29-8-1951). —Juan José Espinosa San Martín. Falanxista. Fillo Adoptivo de Santiago (21-10-1969). —Camilo Alonso Vega. Coñecido como "Camulo" na ditadura, falanxista, Capitán Xeral, Director Xeral da Garda Civil. Fillo Adoptivo de Betanzos (18-1-1961), alcaldía do PSOE; ten unha escultura na entrada do hospital Juan Cardona de Ferrol. —Antonio Carro Martínez, falanxista. Fillo Adoptivo de Santiago (21-11-1965). —Manuel Fraga Iribarne. Fillo Adoptivo da Coruña (24-12-1968), alcaldía do PSOE; Fillo Adoptivo da provincia da Coruña (27-11-1965); Medalla de Prata de Betanzos (11-2-1966), alcaldía do PSOE, dá nome a unha avenida; Medalla de Ouro de Lugo (27-8-1970); Fillo Predilecto e Medalla de Ouro da provincia de Lugo, goberno da deputación de PSOE-BNG; Medalla de Ouro de Santiago (13-2-1965) e, xa en democracia, dá nome a unha avenida, Fillo Adoptivo e Medalla de Ouro ao Mérito Cidadán (17-12-1993) e Medalla de Ouro da cidade (2009); Fillo Adoptivo de Verín (10-8-1964), goberno de PSOE-BNG; dá nome a unha rúa en Cariño. Fillo Predilecto de Vilalba (9-7-1949), alcaldía do PSOE; Fillo Adoptivo de Pontedeume, alcaldía do PSOE; Fillo Adoptivo de Tui (1968), alcaldía do PSOE. —José Ibáñez Martín. Fillo Adoptivo e Medalla de Ouro de Lugo. —Julio Salvador Díaz Benjumea, Tenente Xeral. Fillo Adoptivo de Lugo. —Blas Pérez González, falanxista, Vogal da Xunta de Defensa Nacional en 1936; Medalla de Prata de Santiago (30-5-1947). —Jorge Vigón Suerodíaz, participa na preparación do golpe de Estado de 1936. Fillo Adoptivo de Ferrol (8-2-1958), Santiago (13-2-1965) e Ortigueira (30-9-1959). Non podemos calar!