Integrantes de Galiza Nova —a organización xuvenil do BNG— na comarca do Barbanza rexistraron esta terza feira no Parlamento galego as case dúas mil sinaturas recollidas durante o mes de agosto a través da campaña “Queremos mobilidade para a nosa mocidade”. Estiveron acompañados dos deputados do BNG na cámara Rosana Pérez e Paulo Ríos, así como da Secretaria Xeral de Galiza Nova, Marta Gómez.
“Con esta campaña de recollida de sinaturas percorremos os concellos de Ribeira, A Pobra do Caramiñal, Boiro e Rianxo para exixir a Monbus e á Xunta da Galiza a posta en marcha, así como tamén a súa inclusión na vindeira licitación do servizo, dunha liña de bus que conecte a nosa comarca coa estación de ferrocarril de Catoira”, sinalaron os integrantes de Galiza Nova.
A proposta da organización xuvenil do BNG consiste na creación dunha liña de reforzo nas fins de semana, facendo o percorrido Catoira-Ribeira nas sextas feiras, cun horario que se axuste ao das liñas ferroviarias para que a mocidade poida ir e volver as fins de semana aos seus lugares de estudo “sen depender de ninguén”.
A proposta das mozas inclúe paradas en Ribeira (estación de autobuses), A Pobra do Caramiñal (estación de autobuses), Boiro (praza do Concello) e Rianxo (parada Setefogas) até Catoira (estación de ferrocarril). “Incidimos en que é unha proposta para dar inicio a unha liña de bus inexistente agora mesmo, atendendo unha necesidade que vemos que ten a mocidade da nosa comarca”, sinalan dende a organización.
Esta terza feira, tras case un mes recollendo sinaturas, rexistraron no Parlamento da Galiza ás perto de 2.000 colleitadas durante a campaña. Fixérono acompañados de Paulo Ríos e Rosana Pérez, deputados do BNG na cámara, que xa avanzaron que rexistrarán unha iniciativa para poder levar a proposta a debate no Parlamento galego. Ademais, as mozas e mozos de Galiza Nova Barbanza tamén rexistrarán mocións nos catro concellos da comarca para incidir na presión institucional e irán avanzando outras accións e actividades no marco desta campaña.
Desde a organización xuvenil do BNG tamén agradecen á veciñanza da comarca o apoio recibido nestas semanas. “Queremos agradecer aos centos de veciñas e veciños que se achegaron ás diversas mesas para apoiar este proxecto e que avogan por un país e un Barbanza máis e mellor conectado. Nós só queremos movernos con autonomía e total liberdade polo país e dispor dun transporte público, sostíbel e de calidade. Agardamos que o Partido Popular non faga coma sempre e atenda ás nosas demandas”, sentenciaron.