Nicolás González Casares apostou por impulsar unha verdadeira axenda en favor do “impulso demográfico e contra o despoboamento e o envellecemento” ás dúas beiras do río Miño
González Casares lembrou que as áreas fronteirizas da Galiza e o norte de Portugal son os espazos de maior concentración demográfica e de maior dinamismo de toda a “fronteira luso-española”.
O dirixente socialista apuntou que “ambos territorios contan cunha forte complementariedade e permeabilidade e que deben aspirar a ser o engarce do mundo hispano-luso”.
O candidato do PsdeG destacou “o papel xogado polos fondos comunitarios para reducir o diferencial de renda coa media comunitaria, pero incidiu na necesidade de que ambos os dous territorios fagan forza conxuntamente para atallar o problema do declive demográfico”.
González Casares significou que “as infraestruturas para o transporte e a mobilidade, especialmente as portuarias e ferroviarias, son cruciais para poder capitalizar esas oportunidades e enxalzou os fondos europeos do Plan de Recuperación”.
Infraestruturas
O responsábel do PSdeG amosou o compromiso dos socialistas coa conexión ferroviaria entre a Galiza e Portugal, asegurando que o Goberno do Estado prevé nesa infraestrutura un investimento de 4.500 millóns de euros até 2030.
O dirixente do PSdeG sinalou que “durante a crise financeira, os Gobernos conservadores de España e Portugal deixaron morrer a conexión ferroviaria Vigo-Porto. Grazas ao compromiso do Goberno socialista, a conexión Vigo-Porto vai ser unha realidade”.