"Isto non o agardabades, verdade?", sinalaban nas redes sociais veciñanza e activistas da Plataforma Sarriana polo Río após media ducia de persoas situárense debaixo da ponte do Toleiro para evitar que os operarios contratados pola Conferencia Miño-Sil executasen o seu derrubo.
Indumentad@s con botas de pesca e impermeábeis, activistas do movemento veciñal en defensa do patrimonio etnográfico de Sarria mobilizáronse baixo a ponte do Toleiro para frearen a destrución desta infraestrutura que une a vila coa illa do mesmo nome na que se atopan a maior parte dos ameneiros.
A acción desenvolveuse o día despois de que a Plataforma fora despexada para re-iniciar as obras de encauzamento do río Sarria após un mes de ocupación da illa para evitar a tala das árbores que habitan nela.
A veciñanza reitera que non cesará nas súas reivindicacións e que manterá a súa loita até que sexan escoitadas as súas demandas. Neste senso, 500 veciñ@s mobilizáronse polas rúas de Sarria para amosaren o seu rexeitamento á actitude do concello, da Conferencia Hidrográfica e a Garda Civil.