A sección segunda da Audiencia de Pontevedra condenou esta terza feira a dous anos de prisión un arousán como autor dun delito continuado de abuso sexual.
En virtude do acordo de conformidade alcanzado polas partes, o procesado confesou que, entre setembro e decembro de 2019, realizou tocamentos a unha nena coa que convivía e coa que mantiña unha relación de familiaridade.
O acordo coa Fiscalía supúxolle a redución da pena que inicialmente era de cinco anos de cárcere.
A condena imposta inclúe a prohibición de comunicarse ou achegarse á vítima durante 14 anos, ademais a inhabilitación do acusado para desempeñar calquera profesión ou oficio, sexa ou non retribuído que supoña contacto regular e directo con persoas menores de idade por un tempo de 15 anos.
Ademais, en concepto de responsabilidade civil o condenado deberá indemnizar á vítima cun total de 15.000 euros.
Así mesmo, todas as partes estiveron de acordo coa posibilidade de que o tribunal suspenda a execución da pena, unha circunstancia que quedou condicionada a que abone esta indemnización.
A sentenza é firme e contra ela non cabe recurso.
