Leis de "concordia" para branquear o franquismo

Antes das eleccións xerais de 2023 o PP xa adiantaba que a eliminación da Lei de Memoria Democrática (LMD) sería unha das primeiras medidas se Feixoo era elixido presidente do goberno. Fracasaron pero, xa na oposición, están a traballar para conseguir ese obxectivo desde as comunidades autónomas que gobernan con Vox. Por que o PP e Vox rexeitan a LMD? A LMD non atende todas as reivindicacións do movemento memorialista, pero é rexeitada por PP e Vox porque sinala con toda claridade que o 18 de xullo de 1936 produciuse un "golpe de Estado" (artigo 1.1), que "repudia e condena" (artigo 1.3), ao igual que a "posterior ditadura franquista"; ademais, "declárase ilegal o réxime xurdido da contenda militar iniciada con dito golpe militar". O artigo 1.1 sinala como obxecto desta lei "a recuperación, salvagarda e difusión da memoria democrática, entendida como coñecemento da reivindicación dos valores democráticos e os dereitos e liberdades fundamentais". E o artigo 5.1 declara a "ilegalidade e ilexitimidade dos tribunais, xurados e calquera dos órganos penais ou administrativos que, a partir do golpe de Estado de 1936 foran constituídos, así como a ilexitimidade e nulidade das súas resolucións". Para Feixoo, en 1936 non houbo unha sublevación militar e fascista contra o goberno lexítimo da República O discurso da dereita branquea o franquismo. Para Feixoo, en 1936 non houbo unha sublevación militar e fascista contra o goberno lexítimo da República e facía esta interpretación: "Hai 80 anos os nosos avós e bisavós pelexáronse". Esperanza Aguirre declaraba: "A orixe da Guerra Civil é que o PSOE non acepta a alternancia no poder". As chamadas leis de "concordia" son consecuencia do virus franquista fundacional de AP, despois PP, que acababa o seu congreso en marzo de 1977, promovido por sete ministros de Franco e presidido por Manuel Fraga, cos 3.000 asistentes en pé e coreando Franco, Franco, Franco! Informe da ONU A dereita non acepta a Resolución 39 da Asemblea Xeneral de Nacións Unidas de 12 de decembro de 1946: "De acordo coa súa orixe, natureza, estrutura e conduta xeral, o réxime de Franco é un réxime fascista". E agora rexeita o informe da ONU –asinado por Fabián Salvioli, relator especial sobre a promoción da verdade, a xustiza, a reparación e as garantías de non repetición; Aua Balde, do grupo de traballo sobre as desaparicións forzadas ou involuntarias e Morris Tidball-Binz, relator especial sobre execucións extraxudiciais, sumarias ou arbitrarias– que reclama a "atención urxente do Goberno en relación coas chamadas leis de 'concordia' aprobadas ou presentadas para aprobación parlamentaria nas comunidades autónomas de Aragón, Castela e León e Valencia, que poderían afectar á obrigación do Estado español, incluíndo os seus poderes e entidades nacionais e/o locais, en materia de dereitos humanos". Considera que as iniciativas de PP e Vox poden obstaculizar "o acceso á verdade sobre o destino ou paradoiro das vítimas" da ditadura e alentar "teorías revisionistas ou negacionistas" da Guerra Civil e a ditadura. Ademais, no caso da Comunidade Valenciana equipara as vítimas da ditadura coas do terrorismo de ETA e islámico. O 15 de febreiro de 2024 as Cortes de Aragón aprobaban a Lei de Memoria Democrática que derrogaba a lei de 2018 e que, segundo este informe: "Non fai referencia ás graves violacións de dereitos humanos cometidas polo réxime franquista (1939-1975), senón que se refire ás atrocidades cometidas por un bando durante a Guerra Civil, mentres si menciona a violencia política exercida durante a chamada Segunda República (1931-1939)". E conclúe: "A nova lei invisibiliza as graves violacións de dereitos humanos cometidas durante a ditadura franquista, xa que non fai referencia explícita nin condena o réxime, o seu carácter ditatorial ou a súa responsabilidade polo crimes cometidos neste período". O Goberno asumía ese informe da ONU, instaba a Aragón a derrogar a nova lei e anunciaba que levará ao Tribunal Constitucional as leis contrarias á memoria histórica. A cruz de Neda O PSOE debería predicar co exemplo porque moitas institucións onde goberna non cumpren a LMD e, ás veces, utilizan os mesmos argumentos que a dereita. Así, no Pleno do Concello de Neda de novembro de 2022, o PSOE (maioría absoluta) utilizaba o argumento de "fomentar a concordia" para votar en contra dunha moción do BNG para retirar a cruz dos caídos, monumento de exaltación do franquismo. E no concello de Dueñas (Palencia) onde a miña familia, con catros asasinatos polo fascismo en 1936, está a librar unha batalla para que se elimine a cruz dos caídos, o alcalde do PSOE négase a cumprir a LMD con argumentos como "concordia" e "convivencia".